चिवरी येथील महालक्ष्मी यात्रेस आजपासून प्रारंभ, दर्शनासाठी लाखो भक्तांची मांदियाळी
चिवरी :महाराष्ट्रासह कर्नाटक आंध्रप्रदेशातील लाखो भाविकांचे श्रद्धास्थान असलेल्या तुळजापूर तालुक्यातील चिवरी येथील महालक्ष्मी यात्रोत्सवास मंगळवार दि, १८ पासून प्रारंभ झाला आहे. महालक्ष्मीची यात्रा प्रथेप्रमाणे दरवर्षीच्या माघ पौर्णिमेनंतर येणाऱ्या पहिल्या मंगळवारी साजरी केली जाते. यात्रेनिमित्त देवस्थानच्या वतीने विविध धार्मिक कार्यक्रमाचे आयोजन केले आहे. देवीजींना सोमवारच्या मध्यरात्री महाअभिषेक , अलंकार पूजा करून महाआरती करून नंतर आंबट-गोड भातासह पुरणपोळीचा नैवद्य दाखवण्यात आला. पहाटे गाव ते मंदिर या एक किलोमीटर अंतरावर दंडवत व लिंबाच्या पाल्याने रस्ता झाडण्याचा कार्यक्रम झाला यामध्ये गावातील शेकडो भावीकाने सहभाग नोंदविला होता .मंगळवार हा यात्रेचा मुख्य , या दिवशी नवीन पोतराजांना दीक्षा देणे , दंडवत घेणे , पट बांधणे , लहान मुलांचे जावळ काढणे आदी नवस्फूर्तीचे कार्यक्रम झाले तसेच वाघ्या मुरळी, आराधी पथके, यल्लमाची गाणी, धनगरी ओव्या, पोतराज गाणी, अशा महाराष्ट्रीयन लोक कलेचे धार्मिक कार्यक्रमाने परिसर दुमदुमून गेला होता. देवीच्या दर्शनासाठी लातूर, धाराशिव, बीड, मुंबई, पुणे आदीसह परराज्यातून भाविक मोठ्या संख्येने दाखल झाले होते. विशेष म्हणजे या यात्रेमध्ये हजारो पारधी समाज दाखल झाला होता, तर डॉल्बीच्या तालावर ठेका धरत या भाविकांनी यात्रेमध्ये सर्वांचे लक्ष वेधले. मंगळवारी दिवसभरात मानकरी वाणी पाटील, मराठा-पाटील यांच्या वाड्यावर जाणे, घोंगड्यात भात झेलणे,आदी मानपानाच्या विधी पार पडल्या. मंगळवारी रात्री गावातून देवींची शोभेच्या दारूकामासह पालखी छबिना मिरवणूक काढण्यात काढुन पालखी मानाच्या पुजाऱ्याच्या घरी प्रस्थान होऊन रात्री बारा वाजता मंदिराकडे पालखी प्रस्थान झाली. तसेच होमावहनामध्ये धार्मिक विधी पार पडल्यानंतर भाविकांना महाप्रसाद दिला . तसेच बुधवारी दि,१९ रोजी सकाळी सात वाजता पान व लिंबु याचा घाव होतो. व यात्रेची सांगता होते .यात्रेनिमित्त मंदिरावर आकर्षक विद्युत रोषणाई करण्यात आली आहे, त्याचबरोबर यात्रेमध्ये अनुचित प्रकार घडू नये यासाठी नळदुर्ग पोलीस ठाण्याचे सहाय्यक पोलीस निरीक्षक यांच्या मार्गदर्शनाखाली चोख बंदोबस्त करण्यात आला आहे.मात्र पोलीसांसमोरच यात्रेमध्ये जुगार धंदे तेजीत चालु असल्याचे दिसून आले. तसेच रस्त्याच्या दुरावस्थेमुळे भाविकांना यावर्षीही खड्ड्याचे धक्के खातच प्रवास सहन करावा लागत आहे.
0 Comments