तुळजापूर : दोन दुचाकीचा भीषण अपघात; सावरगाव मधील ४१ वर्षीय व्यक्तीचा मृत्यू; तिघे गंभीर जखमी-Tuljpur Assident News Update
धाराशिव (प्रतिनिधी): तुळजापूर तालुक्यातील सावरगाव परिसरात भरदिवसा झालेल्या दुचाकी अपघातात एका ४१ वर्षीय व्यक्तीचा मृत्यू झाला असून तिघे जण गंभीर जखमी झाल्याची घटना २७ फेब्रुवारी २०२६ रोजी दुपारी सुमारे १२ वाजण्याच्या सुमारास घडली.
या घटनेबाबत पोलिसांकडून मिळालेल्या माहितीनुसार, मयत भागवत गणपत काळे (वय ४१, रा. सावरगाव ता. तुळजापूर) हे रोशन कुमार पासवान (रा. बंगलवा ता. धरुहरा जि. मुंगेर, राज्य बिहार, सध्या मुक्काम येडशी) यांच्यासह मोटारसायकल क्र. एमएच २५ एएम ३८७७ वरून जात होते. त्याच वेळी मोटारसायकल क्र. एमएच २५ बीसी ४८५२ वरील चालक आरोपी अजमोद्दीन मुबारक व्हेगे (रा. आरळी खुर्द ता. तुळजापूर जि. धाराशिव) यांनी आपली मोटारसायकल हायगयी व निष्काळजीपणे चालवत काळे यांच्या दुचाकीला पाठीमागून जोरदार धडक दिली.
या भीषण धडकेत भागवत काळे हे गंभीर जखमी झाले. त्यांना तातडीने उपचारासाठी हलविण्यात आले; मात्र उपचारादरम्यान त्यांचा मृत्यू झाला. या अपघातात रोशन पासवान यांच्यासह आरोपी अजमोद्दीन व्हेगे व त्यांची पत्नी सलमा हे देखील गंभीर जखमी झाले असून त्यांच्यावर उपचार सुरू आहेत.
या प्रकरणी मयताचे बंधू सुरेश गणपत काळे (वय ३९, रा. सावरगाव ता. तुळजापूर जि. धाराशिव) यांनी १ मार्च २०२६ रोजी दिलेल्या फिर्यादीवरून तुळजापूर पोलीस ठाणे येथे भारतीय न्याय संहिता कलम २८१, १२५ (अ), १२५ (ब), १०६ तसेच मोटार वाहन कायदा कलम १८४ अन्वये गुन्हा नोंदविण्यात आला आहे.
पोलिसांनी घटनास्थळी पंचनामा करून पुढील तपास सुरू केला असून अपघाताचे नेमके कारण, वाहनांचा वेग व अन्य बाबींची चौकशी केली जात आहे. या घटनेमुळे सावरगाव परिसरात हळहळ व्यक्त केली जात आहे.
0 Comments