परंडा : टाकळी येथील यमाई देवी मंदिरात चोरी; चांदीचा मुकुट, दागिने व रोख रक्कम लंपास-धाराशिव जिल्ह्यातील घटना -Dharashiv Crime
धाराशिव/प्रतिनिधी : परंडा तालुक्यातील टाकळी येथील प्रसिद्ध यमाई देवी मंदिरात अज्ञात चोरट्यांनी धाडसी चोरी करत मंदिरातील चांदीचा मुकुट, सोन्याचे दागिने आणि दानपेटीतील रोख रक्कम लंपास केल्याची घटना उघडकीस आली आहे. या घटनेमुळे परिसरात खळबळ उडाली असून भाविकांमध्ये संताप व्यक्त होत आहे.
पोलिसांकडून मिळालेल्या माहितीनुसार, दि. 17 एप्रिल 2026 रोजी सायंकाळी 7.00 ते दि. 18 एप्रिल 2026 रोजी सकाळी 7.30 वाजण्याच्या दरम्यान ही चोरी घडली. अज्ञात चोरट्यांनी मंदिराच्या गेटचे कुलूप तोडून आत प्रवेश केला आणि देवीचा सुमारे दीड किलो वजनाचा चांदीचा मुकुट, 3 ग्रॅम वजनाचे सोन्याचे दागिने तसेच दानपेटीतील सुमारे 1,000 रुपयांची रोख रक्कम असा एकूण 1 लाख 21 हजार रुपयांचा मुद्देमाल चोरून नेला.
या प्रकरणी मंदिरातील सेवेकरी पुजारी रत्नमाला आशोक काळे (वय 55 वर्षे, रा. टाकळी ता. परंडा जि. धाराशिव) यांनी दिलेल्या फिर्यादीवरून परंडा पोलीस ठाण्यात अज्ञात आरोपीविरुद्ध भारतीय न्याय संहिता कलम 331(4) व 305(ए) अंतर्गत गुन्हा नोंदविण्यात आला आहे.
घटनेची माहिती मिळताच परंडा पोलिसांनी घटनास्थळी भेट देऊन पंचनामा केला असून चोरट्यांचा शोध घेण्यासाठी तपासाची चक्रे फिरवली आहेत. परिसरातील सीसीटीव्ही फुटेज तपासण्यात येत असून लवकरच आरोपींना अटक केली जाईल, असा विश्वास पोलिसांनी व्यक्त केला आहे.
दरम्यान, धार्मिक स्थळी झालेल्या या चोरीमुळे भाविकांमध्ये भीतीचे वातावरण निर्माण झाले असून मंदिर सुरक्षा व्यवस्थेवर प्रश्नचिन्ह उपस्थित होत आहे.
0 Comments