रेशन दुकानात धिंगाणा; कार्डशिवाय धान्य न दिल्याने मशीन फोडून २५ हजारांचे नुकसान- एकावर गुन्हा दाखल तुळजापूर तालुक्यातील घटना-Tuljapur Live Update News
धाराशिव : जिल्ह्यातील तुळजापूर तालुक्यातील शिराढोण येथे रेशन दुकानात घडलेल्या प्रकारामुळे परिसरात खळबळ उडाली आहे. रेशनकार्डशिवाय धान्य देण्यास नकार दिल्याच्या रागातून एका व्यक्तीने दुकानात तोडफोड करत मशीन फोडून सुमारे २५ हजार रुपयांचे नुकसान केल्याची घटना उघडकीस आली आहे.
याबाबत तुळजापूर पोलीस ठाण्यात गुन्हा नोंद करण्यात आला असून आरोपीचे नाव विजय राजेंद्र गंभीरे (रा. शिराढोण, ता. तुळजापूर, जि. धाराशिव) असे आहे. फिर्यादी उमाबाई अंकुश माने (वय ३०, रा. शिराढोण) यांनी दिलेल्या तक्रारीनुसार हा प्रकार २८ एप्रिल २०२६ रोजी रात्री सुमारे ८ वाजण्याच्या सुमारास घडला.
मिळालेल्या माहितीनुसार, आरोपी विजय गंभीरे हा शिराढोण येथील रेशन दुकानात आला आणि गहू व तांदूळ देण्याची मागणी केली. मात्र, त्याच्याकडे रेशनकार्ड नसल्याने फिर्यादींचे पती अंकुश माने यांनी नियमांनुसार धान्य देण्यास नकार दिला. यावरून संतापलेल्या आरोपीने शिवीगाळ करत दुकानातील मशीन जमिनीवर आपटून फोडले.
इतक्यावरच न थांबता, आरोपीने तेच मशीन फिर्यादीच्या अंगावर टाकण्याचा प्रयत्न केला, ज्यामुळे त्यांच्या जीवितास धोका निर्माण झाला. या घटनेत दुकानातील सुमारे २५ हजार रुपयांचे नुकसान झाले आहे.
या प्रकरणी उमाबाई माने यांनी १ मे २०२६ रोजी तुळजापूर पोलीस ठाण्यात फिर्याद दिली असून, पोलिसांनी भा.न्या.सं. कलम ३२४(४) व १२५ अन्वये गुन्हा दाखल केला आहे. पुढील तपास पोलीस करत आहेत.
0 Comments