🚨अणदूरमध्ये मध्यरात्री एटीएम फोडून चोरी; गॅस कटरने मशीन कापून रोख रक्कम व उपकरण लंपास-Andur Sbi Atm Machine Robbery Crime News

बालाघाट न्युज टाइम्स Saturday, June 13, 2026

तुळजापूर प्रतिनिधी : अणदूर येथील आलुरे शॉपींग सेंटर परिसरात असलेल्या स्टेट बँक ऑफ इंडियाच्या एटीएम केंद्रावर अज्ञात चोरट्यांनी मध्यरात्री धाडसी चोरी करत एटीएम मशीन गॅस कटरच्या सहाय्याने फोडून रोख रक्कम व उपकरण असा एकूण 53 हजार 600 रुपयांचा मुद्देमाल चोरून नेल्याची घटना उघडकीस आली आहे. या घटनेमुळे परिसरात एकच खळबळ उडाली असून पोलिसांनी गुन्हा दाखल करून तपास सुरू केला आहे.
या घटनेबाबत पोलिसांकडून मिळालेल्या माहितीनुसार, दि. 11 जून 2026 रोजी पहाटे सुमारे 2.00 वाजण्याच्या सुमारास अणदूर येथील आलुरे शॉपींग सेंटरमध्ये असलेल्या स्टेट बँक ऑफ इंडियाच्या एटीएम केंद्रात अज्ञात व्यक्तीने उघड्या दरवाज्यातून प्रवेश केला. त्यानंतर आरोपीने एटीएम मशीनवर गॅस कटरचा वापर करून मशीन कापून नुकसान केले आणि मशीनमध्ये असलेली रोख रक्कम तसेच ह्युज्स कंपनीचे मोडेम असा एकूण 53,600 रुपयांचा माल चोरून नेला.
या प्रकरणी फिर्यादी भिकाजी संभाजी लिमकर (वय 45, रा. उचगाव, ता. करवीर, जि. कोल्हापूर) यांनी दिलेल्या फिर्यादीवरून नळदुर्ग पोलीस ठाण्यात भारतीय न्याय संहिता कलम 305(अ), 324(4) अन्वये गुन्हा नोंद करण्यात आला आहे.
घटनेनंतर परिसरातील सीसीटीव्ही फुटेज तपासण्यात येत असून, आरोपींचा शोध घेण्यासाठी पोलिसांकडून विविध पथके कामाला लागली आहेत. एटीएम केंद्रांच्या सुरक्षेचा मुद्दा पुन्हा एकदा चर्चेत आला असून नागरिकांमध्येही चिंतेचे वातावरण निर्माण झाले आहे.या घटनेचा पोलीस पुढील तपास करत आहेत.