गायीने दिला एकाचवेळी चार वासरांना जन्म,मोहोळ तालुक्यातील घटना

मोहोळ तालुक्यातील पापरी  येथील शेतकरी सुरेश लोंढे आपल्या लक्ष्मी गाय आणि चार वासरासह

सोलापूर:सोलापूर जिल्ह्यातील मोहोळ तालुक्यातील पापरी येथील सुरेश लोंढे या शेतकऱ्याकडे असणाऱ्या लक्ष्मी या गायीनं ४ वासरांना जन्म दिला आहे. या दुर्मिळ घटनेची परिसरातील शेतकऱ्यांमध्ये जोरदार चर्चा सुरु आहे.

मोहोळ तालुक्यातील पापरी येथे शेतकऱ्याच्या घरी असलेल्या 'लक्ष्मी' या गाईने एकाच वेळी तीन कालवड आणि एक खोंड अशा मिळून चार वासरांना जन्म दिला आहे. एकाच वेळी चार वासरांना गायीनं जन्म देण्याची पापरी परिसरातील ही पहिलीच आणि दुर्मिळ घटना असल्याने इतर शेतकरी गर्दी करत आहेत. परिसरातील शेतकऱ्याकंडून गायीचं आणि तिचा सांभाळ करणाऱ्या शेतकऱ्याचे कौतुक होत आहे. 

लोंढे कुटुंबीय दरवर्षी या 'लक्ष्मी' गायीचा वाढदिवसही साजरा करतात. 

लोंढे कुटुंबीयांनी पशुधन सांभाळायला सुरुवात लक्ष्मी या गायीपासून पाच वर्षांपूर्वी केली होती. त्यापासूनच लोंढे यांच्या प्रपंचाची आर्थिक घडी व्यवस्थित बसली म्हणून सुरेश लोंढे कुटुंबिय या गाईस 'लक्ष्मी' असे संबोधतात.नोव्हेंबर महिन्यातील २४ तारखेला या गाईला घरी आणले होते, त्यामुळे दरवर्षी २४ नोव्हेंबरला केक कापून वाढदिवस साजरा केला जातो असे लोंढे कुटुंबातील सदस्य गणेश लोंढे यांनी सांगितले.

पापरीतील गाईला पाहण्यासाठी  पंचक्रोशीतील शेतकऱ्यांची गर्दी 

मोहोळ तालुक्यातील पापरी गावातील शेतकरी सुरेश मुरलीधर लोंढे हे शेती सोबतच पूरक व्यवसाय म्हणून पशुपालन करतात. सध्या त्यांच्याकडे संकरित गाई,म्हशी अशी मिळून १२ दूध देणारे पशुधन आहे. त्यातील लक्ष्मी नावाच्या एका संकरित गाईने गुरुवारी सकाळी ७ वाजण्याच्या सुमारास चार वासरांना जन्म दिला आहे.त्यात तीन कालवडी आणि एक खोंड आहे. लक्ष्मी गाईचे हे चौथे वेत आहे. गाईने एकावेळी चार पिलांना जन्म देण्याची ही घटना दुर्मिळ असल्याने परिसरातील शेतकरी सुरेश लोंढे यांच्या घरी गाई व त्याच्या पिलांना पाहण्यासाठी गर्दी करू लागले आहेत.

चारही वासरे ठणठणीत

या बाबत पेनूर येथील पशुधन विकास अधिकारी डॉ. व्ही. बी. गावडे यांच्याशी संवाद साधला असता ते म्हणाले,गाई मध्ये दोन वासरांना जन्म देण्याचे प्रमाण आज पर्यंत निदर्शनास आले आहे.परंतु, एकाच वेळी तीन किंवा चार वासरे होण्याचे प्रमाण क्वचितच असते.पापरी येथील हे उदाहरण दुर्मिळ आहे, प्रत्यक्ष ठिकाणी जाऊन गाई आणि जन्म दिलेल्या वासरांची तपासणी केली असून दोन्हीची प्रकृती उत्तम आहे, असं डॉ. गावडे यांनी सांगितल आहे .

 चार वासरांपैकी एक खोंड आणि तीन कालवडी

याबाबत माहिती देताना शेतकरी  गणेश लोंढे म्हणाले की, गायीने जन्म दिलेल्या चार वासरांपैकी एक खोंड आणि तीन कालवडी आहेत. पहिल्यांदा गाईला खोंड झाले. त्यानंतर थोड्या थोड्या वेळाने गायीनं तीन कालवडींना जन्म दिल्याची माहिती शेतकरी गणेश लोंढे यांनी दिली आहे. गाय आणि ही चारही वासरे व्यवस्थित आहे. शेतकरी लोंढे यांनी २०१८ मध्ये त्यांनी लक्ष्मी नावाची ही गाय खरेदी केली होती. या गायीची आतापर्यंत चार वेळा प्रसूती झाली आहे. त्यात तिने पहिल्यांदा अशा पद्धतीने एकाच वेळी चार वासरांना जन्म दिल्याची घटना घडली आहे. व्यवस्थित खुराक दिल्यानं गायीचे पोषण व्यवस्थित झाल्यानेच असे झाले असावे. ही गाय खऱ्या अर्थाने लक्ष्मी आहे. अशी प्रतिक्रिया शेतकरी गणेश लोंढे यांनी दिली.