ऑनलाइन गंडा : ज्यादा पैशाची आमिष दाखवून तुळजापूर शहरातील पिता -पुत्राची १६ लाखाहुन अधिक रकमेची फसवणूक -online Fraud Cybercrime Police
तुळजापूर प्रतिनिधी रुपेश डोलारे: सध्याच्या काळात सगळ्यांनाच मोबाईलचं वेड लागलं आहे. मात्र या याच काळात ऑनलाइन फसवणूक, फ्रॉड्सचं प्रमाणही वाढताना दिसत आहे. अनेक जणांची ऑनलाइन फसवणूक होते. कधी नोकरीचं आमिष दाखवून तर कधी झटपट पैशाचा मोह दाखवून सायबर गुन्हेगार नागरिकांची फसवणूक करतात. त्यामध्ये लोकांची आयुष्यभराची कमाई जाते. असाच प्रकार तुळजापूर शहरातील एका 54 वर्षीय व्यक्ती आणि त्याच्या मुलाची जादा पैशाची आमीष दाखवून तब्बल 16 लाखाची फसवणूक झाल्याची उघडकीस आले आहे.या प्रकरणी सायबर पोलिस ठाण्यात गुन्हा दाखल करण्यात आला असून, पोलिसांनी तपास सुरू केला आहे.
या घटनेबाबत पोलिसांकडून मिळालेली अधिक माहिती अशी की फिर्यादी कालीदास लिंबाजी गवळी (वय ५४ वर्षे, रा. शुक्रवार पेठ, कणे गल्ली, तुळजापूर, ता. तुळजापूर, जि. धाराशिव) यांच्या मुलाला कृष्णा याला आरोपींनी जास्त पैशांचे आमिष दाखवले. शासनाने ऑनलाइन गेमिंगवर बंदी घातलेली असतानाही, आरोपींनी ‘exchange.com’ नावाची एक बनावट लिंक तयार करून ती व्हॉट्सअॅपवर पाठवली. या लिंकद्वारे फिर्यादी आणि त्यांच्या मुलाची एकूण १६ लाख ८५ हजार ४९८ रुपयांची ऑनलाइन फसवणूक करण्यात आली.
फिर्यादीनुसार, आरोपींनी वेगवेगळ्या मोबाइल नंबरांवरून संपर्क साधला. यात ९०९१९१५८९१, ९५६१४६३८०८, ८४८५०१७४९०, ८७६६४०६५०७, ८४४६२२३५८४, ८०१०७८१८३९, ८४४६९६४५५४ आणि ७३९१८२२००८८ या नंबरांचा समावेश आहे. हे नंबर वापरून आरोपींनी विश्वास संपादन करत फिर्यादींना बनावट योजनेत गुंतवले आणि त्यांची आर्थिक फसवणूक केली.
या घटनेची फिर्याद कालीदास गवळी यांनी २३ ऑगस्ट २०२५ रोजी सायबर पोलिस ठाण्यात दिली. त्यानुसार, पोलिसांनी भारतीय न्यायसंहिता कलम ७८, ३५६(२) आणि माहिती तंत्रज्ञान कायदा कलम ६६(सी) अन्वये गुन्हा नोंदवला आहे. सायबर पोलिस ठाण्याचे अधिकारी या प्रकरणाचा तपास करत असून, आरोपींच्या मोबाइल नंबर आणि बनावट लिंकचा मागोवा घेण्याचे काम सुरू आहे या घटनेचा अधिक तपास सायबर पोलीस करत आहेत.
0 Comments