गॅस सिलेंडर दरवाढीचा झटका; घरगुती सिलेंडर ६० रुपयांनी महाग-LPG Gas Cylinder Price hiked
देशभरातील सर्वसामान्य नागरिकांना पुन्हा एकदा महागाईचा झटका बसला आहे. गेल्या काही महिन्यांपासून स्थिर असलेल्या एलपीजी गॅस सिलेंडरच्या किमतीत अचानक वाढ करण्यात आली असून नवीन दर ७ मार्चपासून लागू झाले आहेत. या दरवाढीमुळे गृहिणींचे मासिक बजेट कोलमडण्याची शक्यता व्यक्त केली जात आहे.
सरकारी तेल कंपनी Indian Oil Corporation (IOCL) कडून गॅस सिलेंडरच्या दरात वाढ करण्याचा निर्णय शनिवारी जाहीर करण्यात आला. या निर्णयानुसार १४.२ किलोच्या घरगुती LPG सिलेंडरच्या किंमतीत ६० रुपयांची वाढ करण्यात आली आहे.
यापूर्वी ८५३ रुपयांना मिळणारा घरगुती सिलेंडर आता ९१३ रुपयांना मिळणार आहे. दिल्लीसह मुंबई, पुणे आणि इतर प्रमुख शहरांमध्येही ही दरवाढ लागू करण्यात आली असून स्थानिक करांनुसार काही ठिकाणी किंमतीत थोडाफार फरक असू शकतो.
दरम्यान, केवळ घरगुती गॅसच नव्हे तर १९ किलोच्या व्यावसायिक सिलेंडरच्या दरातही मोठी वाढ करण्यात आली आहे. व्यावसायिक सिलेंडरच्या किंमतीत सुमारे ११५ रुपयांची वाढ झाली असून, यापूर्वी साधारण १७२० रुपयांना मिळणारा सिलेंडर आता १८३५ ते १८८३ रुपयांपर्यंत मिळणार आहे.
या दरवाढीचा सर्वाधिक फटका हॉटेल व्यावसायिक, ढाबे, तसेच लहान खाद्य विक्रेत्यांना बसण्याची शक्यता आहे. व्यावसायिक सिलेंडर महागल्यामुळे बाहेरच्या जेवणाच्या दरातही वाढ होण्याची शक्यता वर्तवली जात आहे.
तज्ज्ञांच्या मते, सध्या सुरू असलेल्या आंतरराष्ट्रीय तणाव आणि तेलाच्या किमतीतील चढउतार याचा परिणाम जागतिक ऊर्जा बाजारावर होत आहे. विशेषतः इराण-अमेरिका संघर्षामुळे जागतिक स्तरावर इंधन दरांवर दबाव निर्माण झाला असून त्याचे पडसाद भारतातही दिसू लागले आहेत.
दरम्यान, गॅस सिलेंडरच्या वाढलेल्या किमतीमुळे सर्वसामान्य कुटुंबांच्या घरखर्चावर ताण वाढणार असल्याची भावना नागरिकांमधून व्यक्त होत आहे. महागाईच्या पार्श्वभूमीवर सरकारने सर्वसामान्यांना दिलासा देण्यासाठी उपाययोजना कराव्यात, अशी मागणीही होत आहे.
0 Comments