काळाचा घाला! जालन्यात समृद्धी महामार्गावर भीषण अपघात; मजुरांच्या पिकअपला ट्रकची धडक, 8 मजुरांचा मृत्यू-Jalna samruddhi mahamarg Accident
📍 जालना | प्रतिनिधी
जालना जिल्ह्यातील समृद्धी महामार्ग वर बुधवारी घडलेल्या भीषण अपघाताने संपूर्ण राज्य हादरले आहे. कडवंची गावाजवळ मजुरांना घेऊन जाणाऱ्या पिकअप वाहनाला भरधाव ट्रकने मागून जोरदार धडक दिल्याने आठ जणांचा जागीच मृत्यू झाला, तर दोन जण गंभीर जखमी झाले आहेत. हा अपघात बुधवारी दिनांक 1 रोजी सायंकाळी सहाच्या सुमारास घडला आहे.
प्राथमिक माहितीनुसार, या सर्व महिला मजूर समृद्धी महामार्गावर सफाईचे काम करून परत जात होत्या. काम आटोपल्यानंतर त्या पिकअप व्हॅनमध्ये बसून कडवंचीहून जालना शहराच्या दिशेने निघाल्या होत्या. याचवेळी मुंबईच्या दिशेने वेगाने येणाऱ्या ट्रकने त्यांच्या वाहनाला मागून जोरदार धडक दिली.
धडक इतकी भीषण होती की, वाहनातील आठ महिला मजुरांचा जागीच मृत्यू झाला. मृतांमध्ये सहा महिलांचा समावेश असल्याची माहिती समोर आली आहे. या अपघातामुळे समृद्धी महामार्गावर काही काळ वाहतूक पूर्णपणे ठप्प झाली होती त्यानंतर पोलिसांच्या मदतीने वाहतूक सुरळीत करण्यात आले.
हृदयद्रावक दृश्ये, नातेवाईकांचा आक्रोश
अपघातानंतर घटनास्थळी अत्यंत विदारक दृश्य पाहायला मिळाले. रस्त्यावर रक्ताचे डाग, विखुरलेले सामान आणि मृतदेह पाहून नागरिक हादरले.(Maharashtra Latest News) अपघाताची माहिती मिळताच मृतांच्या नातेवाईकांनी घटनास्थळी धाव घेतली. आपल्या आई-वडिलांचे मृतदेह पाहून लहानग्यांनी केलेला आक्रोश मन हेलावून टाकणारा होता.
मदतकार्यावर प्रश्नचिन्ह
अपघातानंतर पोलीस आणि आपत्कालीन यंत्रणा उशिरा पोहोचल्याचा आरोप स्थानिक नागरिकांनी केला आहे. यामुळे काही काळ तणावाचे वातावरण निर्माण झाले होते.
🏥 जखमींची प्रकृती चिंताजनक
या अपघातात दोन जण गंभीर जखमी झाले असून त्यांना तातडीने रुग्णालयात दाखल करण्यात आले आहे. त्यांच्या प्रकृतीबाबत डॉक्टरांकडून सतत निरीक्षण ठेवले जात आहे.
सरकारकडून मदतीची घोषणा
महाराष्ट्र राज्याचे मुख्यमंत्री माननीय देवेंद्र फडणवीस यांनी या या अपघातातील मयतांना भावपूर्ण श्रद्धांजली वाहून मृतांच्या कुटुंबियांना प्रत्येकी ५ लाख रुपयांची आर्थिक मदत जाहीर केली आहे. तसेच जखमींना तातडीने उपचार देण्याचे निर्देश प्रशासनाला दिले आहेत.
मृतांची नावे:
अलकाबाई दादाराव आदमाने (45) – निधोना
लक्ष्मीबाई संतोष मदन (35) – केळीगव्हाण
मीना परमेश्वर आदमाने (45) – निधोना
कांचनबाई प्रकाश आदमाने (50) – निधोना
ताराबाई गहेणाजी चौधरी (60) – केळीगव्हाण
कडूबाई रामदास मदन (55) – केळीगव्हाण
सुमनबाई कचरू आदमाने (70) – निधोना
मंगलबाई शिनगारे
🚨 अपघाताचे कारण अद्याप अस्पष्ट
या भीषण अपघाताचे नेमके कारण अद्याप समोर आलेले नसून पोलिसांकडून तपास सुरू आहे. मात्र, या घटनेनंतर समृद्धी महामार्गावरील वाढत्या अपघातांचा प्रश्न पुन्हा एकदा ऐरणीवर आला आहे.
0 Comments