तुळजापूरात धारदार शस्त्राने तरुणाची निर्घृण हत्या; जुन्या वादातून दोन जणांवर गुन्हा-Tuljapur Murder Crime News
तुळजापूर (प्रतिनिधी) : शहरात धक्कादायक घटना घडली असून जुन्या वादाच्या कारणावरून 19 वर्षीय तरुणाची धारदार शस्त्राने वार करून निर्घृण हत्या करण्यात आली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, मयत कृष्णा अनंत रसाळ (वय 19, रा. एस.टी. कॉलनी, तुळजापूर) हा दि. 03 मे 2026 रोजी रात्री सुमारे 12.10 वाजण्याच्या सुमारास डॉ. बाबासाहेब आंबेडकर चौकातील जय मेडिकल समोर उभा असताना आरोपी प्रथमेश कांबळे व प्रसाद रोचकरी (दोघे रा. तुळजापूर) यांनी त्याला गाठले. मागील भांडणाच्या कारणावरून दोघांनी प्रथम शिवीगाळ केली आणि त्यानंतर तिक्ष्ण हत्याराने कृष्णा याच्या गळ्यावर खुपसून तसेच खांदा व पोटावर वार केले.
या हल्ल्यात गंभीर जखमी झालेल्या कृष्णा रसाळ याचा घटनास्थळीच मृत्यू झाला. घटनेनंतर आरोपी फरार झाल्याची माहिती आहे.
याप्रकरणी मयताचा वडील अनंत महादेव रसाळ (वय 49) यांनी दि. 04 मे 2026 रोजी तुळजापूर पोलीस ठाण्यात फिर्याद दिली आहे. त्यांच्या फिर्यादीवरून आरोपींविरुद्ध भारतीय न्याय संहिता कलम 103(1), 115(2), 352, 3(5) अन्वये गुन्हा नोंद करण्यात आला आहे.
पोलिसांनी घटनास्थळी पंचनामा करून पुढील तपास सुरू केला असून आरोपींचा शोध सुरू आहे. या घटनेमुळे तुळजापूर शहरात भीतीचे वातावरण निर्माण झाले आहे.
0 Comments