रेशनधारकासाठी खुशखबर, गुढीपाडवा आणि डॉ. बाबासाहेब आंबेडकर यांच्या जयंतीला मिळणार आनंदाचा शिधा, राज्य मंत्रिमंडळाचा आज निर्णय

मुंबई : राज्यातील सर्वसामान्यांची दिवाळी गोड व्हावी यासाठी फक्त १०० रुपयांमधे आनंदाचा शिधा देण्याचा निर्णय घेण्यात आला होता. आता दिवाळीच नाही तर गुढीपाडवा आणि डॉ बाबासाहेब आंबेडकर जयंतीलाही आनंदाचा शिधा मिळणार आहे. यासंदर्भातील निर्णय आज बुधवारी दि, २२ रोजी झालेल्या मंत्रिमंडळाच्या बैठकीत घेण्यात आला.

गुढीपाडवा तसेच डॉ बाबासाहेब आंबेडकर जयंतीनिमित्त शिधापत्रिकाधारकांना १०० रुपयांत आनंदाचा शिधा देण्याचा निर्णय मंत्रिमंडळ बैठकीत घेण्यात आला आहे. याचा लाभ १ कोटी ६३ लाख शिधा पत्रिकाधारकांना होईल. यापूर्वी दिवाळीत हा आनंदाचा शिधा देण्यात आला होता. अंत्योदय अन्न योजना, प्राधान्य कुटुंब तसेच औरंगाबाद व अमरावती विभागातील सर्व आणि नागपूर विभागातील वर्धा अशा १४ शेतकरी आत्महत्याग्रस्त जिल्ह्यातील दारिद्र्य रेषेवरील केशरी शेतकरी शिधा पत्रिकाधारकांना हा आनंदाचा शिधा देण्यात येणार आहे.आज मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या उपस्थितीत पार पडलेल्या मंत्रिमंडळाच्या बैठकीत आनंदाचा शिधा गुढीपाडव्याला आणि डॉक्टर बाबासाहेब आंबेडकर जयंतीलां वाटण्याचा निर्णय झाला आहे.

१०० रुपयांमध्ये या मिळणार वस्तू 

  आनंदाच्या शिधामध्ये १ किलो रवा, १ किलो चणा डाळ, १ किलो साखर आणि १ लिटर पामतेल याचा समावेश आहे. आनंदाचा शिधा गुढी पाडव्यापासून पुढील १ महिन्याच्या कालावधीसाठी ई-पॉसद्धारे १०० रुपये प्रतिसंच असा सवलतीच्या दरात दिला जाईल. ई-पॉसची व्यवस्था नसलेल्या ठिकाणी ऑफलाईन पद्धतीने हा शिधा दिला जाईल असे राज्य सरकारने म्हटले आहे.