दुःखद घटना: नवी कोरी कार शिक्षकाच्या जीवावर घेतली, कार सह विहिरीत बुडून शिक्षकाचा मृत्यू, पाच दिवसापूर्वी घेतली होती कार ,उत्तर सोलापूर तालुक्यातील घटना
सोलापूर: पाच दिवसांपूर्वी नवीन घेतलेली टियागो कार झाडाखाली सावलीत लावण्यासाठी स्टार्ट केली असता, ती कार नियंत्रण सुटल्याने समोरील शेतामधील विहिरीत कोसळून ४१ वर्षीय शिक्षक पाण्यात मोटारीसह बुडून मृत्युमुखी पडल्याची दुर्दैवी घटना उत्तर सोलापूर तालुक्यातील डोणगाव येथील भाटेवाडी येथे रविवारी दि,१७ सप्टेंबर रोजी घडली.
इराण्णा बसप्पा जुजगार वय (४१) राहणार मल्लिकार्जुन नगर अक्कलकोट रोड सोलापूर असे त्या मृत शिक्षकाचे नाव आहे. ते वडगाव येथील जिल्हा परिषद शाळेतील शिक्षक होते. त्यांचे, मुळगाव मैंदर्गी आहे, पाच दिवसांपूर्वीच त्यांनी टाटा कंपनीची टियागो नवीन मोटर कार (Mh-13EC6068) खरेदी केली होती. ते रविवार सुट्टीचा दिवस असल्याने ते आपले मेहुणे उदयन चंद्रशेखर आमले यांच्या शेताला डोणगाव शहरातील भाटेवाडी येथे कुटुंबासोबत आले होते, त्यांना नवीन गाडी घेतल्याचे पेढेही वाटायचे होते. दुपारी साडेबारा एक वाजता सोलापूरहून भाटेवाडी शिवारात सर्व कुटुंबीय गाडीतून आले. सर्व कुटुंबीय व कार ड्रायव्हर घरात गेले.
तेव्हा शिक्षक इराण्णा जुजगार हे ड्रायव्हर सीटवर बसले आणि कार झाडाखाली लावण्यासाठी स्टार्ट केली आणि अचानक नियंत्रण सुटल्याने ही कार सुसाट वेगात समोरील विहिरीमध्ये क्षणार्धात जाऊन कोसळली. नातेवाईक उदयन चंद्रशेखर आमले यांनी इतरांच्या सहकाऱ्यांनी त्यांना बाहेर काढून येथील शासकीय रुग्णालयामध्ये दाखल केले असता त्यांचा उपचारापूर्वीच मृत्यू झाल्याचे डॉक्टरांनी घोषित केले. या घटनेची प्राथमिक माहिती सिविल पोलीस चौकीमध्ये नोंद करण्यात आली आहे. मृत शिक्षक इराण्णा जुजगार यांच्या पश्चात पत्नी एक मुलगा एक मुलगी असा परिवार आहे. घटनेने परिसरात हळहळ व्यक्त होत आहे.
0 Comments