धक्कादायक घटना :बीडमधील वडवणी न्यायालयात सरकारी वकिलाने गळफास घेऊन जीवन संपविले-
बीड /प्रतिनिधी रूपेश डोलारे : जिल्ह्यातील वडवणी न्यायालयीन क्षेत्राला हादरवून टाकणारी धक्कादायक घटना बुधवारी (दि. २० ऑगस्ट) सकाळी १० वाजण्याच्या सुमारास उघडकीस आली. वडवणी येथील न्यायालयात सहाय्यक सरकारी अभियोक्ता व्ही. एल. चंदेल (वय अंदाजे ४०) यांनी वकिलांच्या चेंबरमधील खिडकीच्या गजाला गळफास घेऊन आत्महत्या केली. या घटनेमुळे न्यायालयात एकच खळबळ उडाली होती.
सकाळी साधारण दहा वाजताच्या सुमारास न्यायालयीन कर्मचारी व वकील कामकाजासाठी हजर झाले असता ही घटना निदर्शनास आली. अचानक समोर आलेल्या या प्रकारामुळे न्यायालयीन परिसरात मोठी खळबळ उडाली.
चंदेल यांची नुकतीच, जानेवारी २०२५ मध्ये, सहाय्यक सरकारी अभियोक्ता म्हणून नियुक्ती झाली होती. फक्त सात-आठ महिन्यांतच त्यांनी जीवन संपवल्याने सहकारी वकील, न्यायालयीन कर्मचारी आणि स्थानिक नागरिकांमध्ये हळहळ व्यक्त केली जात आहे.
दरम्यान, आत्महत्येचे नेमके कारण मात्र अद्याप समोर आलेले नाही. पोलिसांनी घटनास्थळ पंचनामा करून मृतदेह शवविच्छेदनासाठी ग्रामीण रुग्णालयात हलविला असून पुढील तपास सुरू आहे.दरम्यान, मृत वकिलाच्या खिशातून पोलिसांना एक चिठ्ठी मिळाली आहे. मात्र त्या चिठ्ठीमध्ये नेमका काय मजकूर आहे, हे अद्याप उघड झालेले नाही. पोलिसांनी ती चिठ्ठी ताब्यात घेऊन तपासाला सुरूवात केली आहे.
0 Comments