Nashik-गुन्हे सिद्ध झाले तर भर चौकात गोळी मारा!” – कालीचरण महाराजांचा संताप; अशोक खरात प्रकरणावर तीव्र प्रतिक्रिया-
धाराशिव: नाशिकमध्ये उघडकीस आलेल्या भोंदूबाबा अशोक खरात प्रकरणाने राज्यभर खळबळ उडाली असून, महिलांच्या लैंगिक शोषणापासून ते बेनामी संपत्तीपर्यंत अनेक धक्कादायक बाबी समोर आल्या आहेत. पोलिसांनी अशोक खरातला अटक केली असून, या प्रकरणाच्या सखोल तपासासाठी एसआयटी (SIT) पथक स्थापन करण्यात आले आहे.
या प्रकरणावर आता धार्मिक क्षेत्रातूनही तीव्र प्रतिक्रिया उमटू लागल्या आहेत. धाराशिव येथील एका खाजगी कार्यक्रमात बोलताना कालीचरण महाराज यांनी या प्रकरणावर अत्यंत कठोर शब्दांत संताप व्यक्त केला आहे.
“धर्माच्या नावावर ठगी करणारे नरकात जातील”
पत्रकारांशी बोलताना कालीचरण महाराज म्हणाले की,
“आज प्रत्येक क्षेत्रात व्यवहार चालतो. वकील, डॉक्टर, मजूर सगळेच पैसे घेतात. तसेच धर्मकार्य करणाऱ्यांनाही मानधन मिळणे चुकीचे नाही. मात्र लोकांना ठगणे, फसवणे आणि धर्माच्या नावावर चुकीचे कृत्य करणे हे गंभीर पाप आहे.”त्यांनी स्पष्ट शब्दांत सांगितले की,
“जो लोकांना ठगतो, कूकर्म करतो तो नरकात जाणारच आहे, तसेच त्याला शासकीय शिक्षाही मिळणार आहे.”
“गुन्हे सिद्ध झाले तर भर चौकात गोळी मारली पाहिजे”
या प्रकरणावर संताप व्यक्त करताना त्यांनी अत्यंत कठोर भूमिका मांडली.
“लोकांनी ज्यांना पूजनीय स्थान दिले, त्याच पदाचा गैरवापर करून जर कोणी धर्माला कलंक लावत असेल, तर ते महापापी आहेत. अशा लोकांचे गुन्हे सिद्ध झाले तर त्यांना भर चौकात गोळी मारली पाहिजे,” असे ते म्हणाले.
लैंगिक शोषण आणि भीती दाखवून लूट – गंभीर आरोप
अशोक खरातवर महिलांचे लैंगिक शोषण, भीती दाखवून पैसे उकळणे, तसेच अनेक अनैतिक कृत्यांचे आरोप आहेत. यासंदर्भातील काही व्हिडिओ देखील समोर आल्याने प्रकरण अधिकच गंभीर बनले आहे. त्यामुळे समाजातील सर्व स्तरांतून कठोर कारवाईची मागणी जोर धरत आहे.
“राजकारण आणि साधूंचा संबंध”
कालीचरण महाराज यांनी यावेळी राजकारणावरही भाष्य केले.
ते म्हणाले की,
“मोठ्या साधू-संतांच्या मागे मोठा जनसमुदाय असतो. त्यामुळे राजकारण्यांना त्यांचा पाठिंबा मिळावा अशी इच्छा असते. पण जर तो साधू भ्रष्ट निघाला, तर त्याच्याकडे कोणीही पाहत नाही.”
अशोक खरात प्रकरणाने धर्माच्या नावाखाली सुरू असलेल्या भोंदूपणावर मोठा प्रश्नचिन्ह निर्माण केला आहे. या पार्श्वभूमीवर कालीचरण महाराज यांची तीव्र प्रतिक्रिया चर्चेचा विषय ठरत असून, आता सर्वांचे लक्ष SIT तपास आणि पुढील कारवाईकडे लागले आहे.
0 Comments