🚨 उमरगा जवळ भीषण अपघात : देवदर्शनहुन परतताना कार हॉटेलमध्ये घुसली; दोन जणांचा जागीच मृत्यू, एक गंभीर जखमी -Umerga Road Accident News

बालाघाट न्युज टाइम्स Tuesday, March 10, 2026

🚨 उमरगा जवळ भीषण अपघात : देवदर्शनहुन परतताना कार हॉटेलमध्ये घुसली; दोन जणांचा जागीच मृत्यू, एक गंभीर जखमी -Umerga Road Accident News

धाराशिव : सोलापूर–हैदराबाद राष्ट्रीय महामार्गावर उमरगा शहराजवळ मंगळवारी (दि. १०) सकाळी भीषण अपघात घडला. लग्नासाठी निघालेल्या भरधाव कारचे टायर अचानक फुटल्याने वाहनावरील चालकाचा ताबा सुटला आणि कार थेट रस्त्याच्या कडेला असलेल्या चहाच्या स्टॉलमध्ये घुसली. या भीषण अपघातात चहाच्या दुकानात बसलेल्या दोन जणांचा जागीच मृत्यू झाला असून एक जण गंभीर जखमी झाला आहे.

मिळालेल्या माहितीनुसार, उमरगा शहराजवळील सोलापूर–हैदराबाद महामार्गावर भारत टायरजवळ मंगळवारी सकाळी सुमारे १० वाजण्याच्या सुमारास ही दुर्घटना घडली. तेलंगणा राज्यातील एक कुटुंब तुळजापूर तालुक्यातील श्री तुळजाभवानी देवीचे दर्शन घेऊन परत आपल्या गावी जात होते.

दरम्यान, कार क्रमांक TS 34 F 4706 ही भरधाव वेगाने जात असताना अचानक तिचे टायर फुटले. टायर फुटल्यामुळे चालकाचा वाहनावरील ताबा सुटला आणि कार थेट महामार्गाच्या बाजूला असलेल्या चहाच्या स्टॉलमध्ये घुसली.

अपघाताचा जोर इतका होता की, चहाच्या स्टॉलसमोर उभी असलेली दुचाकी पूर्णपणे चक्काचूर झाली. त्याचवेळी स्टॉलमध्ये चहा घेत बसलेल्या ग्राहकांना कारने जोरदार धडक दिली. या धडकेत दोन जण गंभीर जखमी झाले आणि त्यांचा घटनास्थळीच मृत्यू झाला.

या भीषण अपघातात उमरगा येथील माजी नगरसेवक बळी पवार आणि जनता अर्थ मुव्हर्सचे मालक लाडनशहा मुर्शद यांचा जागीच मृत्यू झाल्याची माहिती प्रत्यक्षदर्शींनी दिली आहे. तर मेकॅनिक सचिन कुठार हे गंभीर जखमी झाले असून त्यांना तातडीने शासकीय रुग्णालयात उपचारासाठी दाखल करण्यात आले आहे.

अपघातानंतर परिसरातील नागरिकांनी तत्काळ घटनास्थळी धाव घेतली आणि जखमींना रुग्णालयात हलवण्यास मदत केली. घटनेची माहिती मिळताच पोलिसांनीही घटनास्थळी धाव घेतली असून पंचनामा करून पुढील तपास सुरू केला आहे.

या अपघातात निष्पाप लोकांचा मृत्यू झाल्यामुळे उमरगा शहरात हळहळ व्यक्त केली जात असून परिसरात शोककळा पसरली आहे.या प्रकरणाचा अधिक तपास पोलीस करत आहेत.

# धाराशिव-प्रतिनिधी रूपेश डोलारे