समृद्धी महामार्गावर भीषण अपघात; अशोक खरातचे निकटवर्तीय जितेंद्र शेळके यांचा मृत्यू, घातपाताची शक्यता चर्चेत-Dr Jitendra shelke Accidental Death
छत्रपती संभाजीनगर : समृद्धी महामार्गावर झालेल्या भीषण कार अपघातात शिवनिका ट्रस्टचे उपाध्यक्ष आणि अशोक खरात यांचे निकटवर्तीय जितेंद्र शेळके यांचा मृत्यू झाला. या घटनेमुळे परिसरात एकच खळबळ उडाली असून हा अपघात की घातपात, याबाबत विविध स्तरातून शंका व्यक्त केली जात आहे.
मिळालेल्या माहितीनुसार, समृद्धी महामार्गावर शेळके यांच्या कारचा भीषण अपघात झाला. अपघात इतका गंभीर होता की त्यामध्ये त्यांचा जागीच मृत्यू झाला. घटनेनंतर पोलिसांनी घटनास्थळी धाव घेत पंचनामा करून तपास सुरू केला आहे.
जितेंद्र शेळके हे भोंदू अशोक खरात यांच्या शिवनिका ट्रस्टमध्ये उपाध्यक्ष म्हणून कार्यरत होते. त्यांच्या अचानक झालेल्या मृत्यूमुळे अनेक प्रश्न उपस्थित होत आहेत. गेल्या काही दिवसांपासून अशोक खरात प्रकरण चर्चेत असून त्याच पार्श्वभूमीवर हा अपघात घडल्याने संशय अधिक गडद झाला आहे.
दरम्यान, राष्ट्रवादी काँग्रेसचे आमदार रोहित पवार यांनी या प्रकरणाची सखोल चौकशी करण्याची मागणी केली आहे. “हा केवळ अपघात आहे की घातपात, याचा तपास झाला पाहिजे. तसेच या प्रकरणाशी संबंधित व्यक्तींच्या सुरक्षेची काळजी घेणे आवश्यक आहे,” असे त्यांनी म्हटले आहे.
तसेच उद्धवसेनेच्या नेत्या सुषमा अंधारे यांनीही या घटनेवर तीव्र प्रतिक्रिया दिली आहे. “जितेंद्र शेळके यांच्या मृत्यूमुळे अनेक शंका निर्माण होत आहेत. तपास यंत्रणांनी वेगाने आणि पारदर्शकपणे चौकशी केली पाहिजे. अन्यथा जनतेत संशय वाढत राहील,” अशी टीका त्यांनी केली.
या घटनेमुळे समृद्धी महामार्गावरील सुरक्षेचा प्रश्न पुन्हा एकदा ऐरणीवर आला आहे. पोलिसांकडून अपघाताचे नेमके कारण शोधण्याचे प्रयत्न सुरू असून, तांत्रिक तपास, सीसीटीव्ही फुटेज आणि वाहनांची तपासणी केली जात आहे.
सध्या या प्रकरणाकडे संपूर्ण राज्याचे लक्ष लागले असून, पुढील तपासातून नेमके सत्य समोर येण्याची अपेक्षा व्यक्त केली जात आहे.
0 Comments