नळदुर्ग :निर्दयपणे कोंबून प्राण्यांची वाहतूक; पिकअपसह आरोपीवर गुन्हा दाखल” नळदुर्ग पोलिसांची कारवाई-Naldurg Crime News
धाराशिव (प्रतिनिधी): प्राण्यांना अत्यंत निर्दयपणे वागणूक देत बेकायदेशीररीत्या वाहतूक करणाऱ्या एका आरोपीविरोधात नळदुर्ग पोलिसांनी गुन्हा दाखल केला आहे. या कारवाईमुळे प्राणीसंवर्धनाबाबत पुन्हा एकदा प्रश्नचिन्ह उपस्थित झाले आहे.
मिळालेल्या माहितीनुसार, भाशाखॉजा शेख (वय २२, रा. येमीनेनीवरपालक, ता. चेरुकुपाल्ली, जि. गुंटूर, आंध्रप्रदेश) हा आरोपी दि. ६ एप्रिल २०२६ रोजी रात्री सुमारे ११.२० वाजण्याच्या सुमारास अणदूर येथील बसस्थानकासमोरील पुलाखाली संशयास्पदरीत्या आढळून आला. त्याच्या ताब्यातील एपी 39 डब्ल्यूएच 3440 क्रमांकाच्या पिकअप वाहनात तब्बल १० घोडे (खेचर) अत्यंत क्रूरपणे कोंबून ठेवलेले होते.
या प्राण्यांना कोणत्याही प्रकारची चारा-पाणी व्यवस्था करण्यात आलेली नव्हती. अत्यंत अरुंद जागेत कोंबून, निर्दयतेने त्यांची वाहतूक केली जात असल्याचे निदर्शनास आले. या प्रकरणात अंदाजे १ लाख ५० हजार रुपयांच्या किमतीचे प्राणी जप्त करण्यात आले आहेत.
नळदुर्ग पोलिसांनी तातडीने कारवाई करत आरोपीस ताब्यात घेतले. या प्रकरणी सरकारतर्फे आरोपीविरोधात प्राण्यांना क्रूरतेने वागण्यास प्रतिबंध अधिनियम कलम ११(१) तसेच मोटार वाहन कायदा कलम १७७ आणि महाराष्ट्र मोटार वाहन अधिनियम कलम ८३ अन्वये गुन्हा दाखल करण्यात आला आहे.
या घटनेमुळे प्राण्यांप्रती संवेदनशीलता आणि कायद्याची अंमलबजावणी याबाबत चर्चा सुरू झाली असून, पुढील तपास नळदुर्ग पोलीस करत आहेत.
0 Comments