तामलवाडीतील ‘मिलन लॉज’वर पोलिसांचा छापा; अनैतिक देहव्यापार प्रकरणी दोघांना अटक, तीन महिलांची सुटका-Tamawadi Police Station Crime News
धाराशिव: तुळजापूर तालुक्यातील तामलवाडी येथे सुरू असलेल्या अनैतिक देहव्यापारावर अनैतिक मानवी वाहतूक शाखेच्या पथकाने मोठी कारवाई करत ‘मिलन लॉज’वर छापा टाकला. या कारवाईत दोन आरोपींना अटक करण्यात आली असून तीन महिलांची सुटका करण्यात आली आहे.
पोलीसांकडून मिळालेल्या माहितीनुसार, अनैतिक मानवी वाहतूक शाखेच्या पथकाला गुप्त बातमीदारामार्फत माहिती मिळाली होती की, तामलवाडी येथील मिलन लॉजमध्ये काही महिलांकडून वेश्या व्यवसाय करून घेतला जात आहे. या माहितीची खात्री करून पथकाने संबंधित ठिकाणी छापा टाकला.
छाप्यामध्ये लॉजमध्ये तीन महिला (नाव व गाव गोपनीय) आढळून आल्या. महिला पोलिसांकडून त्यांची विचारपूस करण्यात आली असता, आरोपी दिलीप सिद्धाप्पा मंगरुळे (वय 43, रा. अविनाश नगर, एमआयडीसी सोलापूर) आणि संतोष नामदेव पवार (वय 40, रा. तिऱ्हे, ता. उत्तर सोलापूर) यांच्या सांगण्यावरून त्यांना वाणिज्यिक कारणासाठी आश्रय देऊन देहव्यापार करण्यास प्रवृत्त करण्यात येत असल्याचे उघड झाले.
या प्रकरणात आरोपी स्वतःच्या उपजीविकेसाठी या व्यवसायातून आर्थिक फायदा घेत असल्याचेही समोर आले आहे. पोलिसांनी तत्काळ कारवाई करत दोन्ही आरोपींना ताब्यात घेतले.
छाप्यात पोलिसांनी आरोपींकडून २ मोबाईल फोन, पिग्मीचे छोटे पासबुक, नोंदणी रजिस्टर, यूपीआय स्कॅनर मशीन, लॉजचा परवाना फॉर्म, रोख रक्कम ५,७०० रुपये तसेच निरोधाची पाकिटे असा एकूण २५,७०० रुपयांचा मुद्देमाल जप्त केला.
तसेच, लॉजमध्ये आढळलेल्या तीन महिलांची सुटका करून त्यांना सुरक्षित ठिकाणी हलविण्यात आले आहे.
या प्रकरणी दिलीप मंगरुळे व संतोष पवार यांच्याविरोधात गुन्हा क्रमांक 60/2026 अन्वये भारतीय न्याय संहिता (BNS) कलम 143, 144, 3(5) तसेच मानवी अनैतिक व्यवसाय प्रतिबंधक अधिनियमाच्या कलम 3, 4, 5 अंतर्गत तामलवाडी पोलीस ठाण्यात 24 एप्रिल 2026 रोजी गुन्हा दाखल करण्यात आला आहे.
पुढील तपास पोलीस करत असून या कारवाईमुळे परिसरात एकच खळबळ उडाली आहे.
0 Comments