ट्रॅक्टरला रस्ता देण्याच्या कारणावरून दोन गटांत तुफान हाणामारी; परस्परांविरुद्ध गुन्हे दाखल-धाराशिव जिल्हातील घटना --Breaking News 
धाराशिव : वाशी तालुक्यातील खामकरवाडी येथे ट्रॅक्टरला रस्ता देण्याच्या कारणावरून दोन गटांमध्ये झालेल्या वादाचे रूपांतर तुफान हाणामारीत झाले. या घटनेत दोन्ही बाजूंचे अनेक जण गंभीर जखमी झाले असून याप्रकरणी येरमाळा पोलीस ठाण्यात परस्परांविरुद्ध गुन्हे दाखल करण्यात आले आहेत.
पहिल्या घटनेत फिर्यादी नरसिंग प्रभू वाघमारे (वय 55, रा. खामकरवाडी ता. वाशी) यांनी दिलेल्या फिर्यादीनुसार, दि. 19 मे 2026 रोजी सायंकाळी 6.30 ते 7.30 वाजण्याच्या सुमारास खामकरवाडी येथे ट्रॅक्टर जाण्यासाठी रस्ता न दिल्याच्या कारणावरून आरोपी नाना सर्जेराव कोकाटे, अनिकेत नाना कोकाटे, शशिकांत नाना कोकाटे, सर्जेराव लिंबा कोकाटे, उत्रेश्वर बन्सी कोकाटे, बन्सी सर्जेराव कोकाटे, ओंकार बन्सी कोकाटे, अंबादास बालाजी लुगडे, रंजित पोपट लुगडे, स्वप्नील बप्पा पौह, सुरज रामदास जगदाळे, शहाजी हिरबा लुगडे, पंकज पोपट लुगडे, किरण मोहन इदगे, निखील बालाजी लुगडे व किशोर मोहन इदगे यांनी गैरकायद्याची मंडळी जमवून शिवीगाळ करत लाथाबुक्यांनी, दगड व काठ्यांनी मारहाण केली. तसेच भांडण सोडवण्यासाठी आलेल्या नातेवाईकांनाही मारहाण करून गंभीर जखमी केल्याचे फिर्यादीत नमूद करण्यात आले आहे. आरोपींनी जीवे मारण्याची धमकी दिल्याचाही आरोप करण्यात आला आहे.
दुसऱ्या घटनेत फिर्यादी उत्रेश्वर बन्सी कोकाटे (वय 27, रा. खामकरवाडी) यांनी दिलेल्या फिर्यादीनुसार, त्याच दिवशी सायंकाळी 6.30 ते 6.45 वाजण्याच्या सुमारास तेरखेडा येथील बालाजी आण्णा घोलप यांच्या फटाका कारखान्याजवळ आरोपी नरसिंह प्रभू वाघमारे, अजय नरसिंह वाघमारे, सिध्दु सर्जेराव कोकाटे, सदाशिव येडबा वाघमारे, सागर सोमनाथ कोकाटे, विजय नरसिंह वाघमारे, विष्णु शंकर सावत, महादेव येडबा वाघमारे व सुनिता नरसिंह वाघमारे यांनी योगेश वासुदेव लुगडे याच्या अंगावर ट्रॅक्टर घालण्याच्या प्रकाराबाबत विचारणा केल्याच्या कारणावरून वाद घालत लोखंडी रॉड, दगड व काठ्यांनी मारहाण केली. तसेच भांडण सोडवण्यासाठी आलेल्या नातेवाईकांनाही मारहाण करून गंभीर जखमी केल्याचे फिर्यादीत म्हटले आहे.
दोन्ही प्रकरणांमध्ये येरमाळा पोलीस ठाण्यात भारतीय न्याय संहिता कलम 109, 118(1), 115(2), 352, 351(2), 351(3), 189(2), 191(2), 191(3), 190 अन्वये गुन्हे दाखल करण्यात आले असून पुढील तपास येरमाळा पोलीस करत आहेत.
0 Comments