जादा परताव्याचे आमिष अन् ६३.६५ लाखांचा गंडा’ : बनावट ॲपद्वारे गुंतवणूक फसवणुकीचा गुन्हा सायबर पोलिसांत दाखल-online Fraud Dharashiv Crime Branch News

जादा परताव्याचे आमिष अन् ६३.६५ लाखांचा गंडा’ : बनावट ॲपद्वारे गुंतवणूक फसवणुकीचा गुन्हा सायबर पोलिसांत दाखल-online Fraud Dharashiv Crime Branch News 

धाराशिव, दि. २४ : ऑनलाईन गुंतवणुकीत मोठा परतावा मिळवून देण्याचे आमिष दाखवत बनावट ॲपच्या माध्यमातून तब्बल ६३ लाख ६५ हजार रुपयांची आर्थिक फसवणूक केल्याचा प्रकार उघडकीस आला आहे. या प्रकरणी सायबर पोलीस ठाण्यात दोन जणांविरुद्ध गुन्हा दाखल करण्यात आला आहे.

सायबर पोलिसांनी दिलेल्या माहितीनुसार, फिर्यादी सिद्राम यशवंत साखरे (वय ५०, रा. उमरगा (चि.), ता. तुळजापूर, जि. धाराशिव) यांनी दिलेल्या फिर्यादीवरून हा गुन्हा नोंदवण्यात आला आहे.

फिर्यादीनुसार, आरोपी गणेशराव रमेश गोपाळे आणि शांतनु रमेश गोपाळे (दोघे रा. बोरगाव नांदु, ता. राहुरी, जि. अहिल्यानगर) यांनी कथितपणे ‘एआय ट्रेड’ नावाच्या कंपनीच्या माध्यमातून एक बनावट ॲप तयार केले. या ॲपच्या माध्यमातून गुंतवणूक केल्यास कमी कालावधीत जादा आर्थिक परतावा मिळेल, असे आमिष फिर्यादीला दाखवण्यात आले.

या आमिषाला बळी पडून फिर्यादी यांनी दि. १४ नोव्हेंबर २०२५ रोजी दुपारी २.३० वाजल्यापासून ते दि. १७ नोव्हेंबर २०२५ रोजी सकाळी ८.३० वाजेपर्यंत विविध व्यवहारांद्वारे नेट बँकिंगच्या माध्यमातून आरोपींकडे रक्कम वर्ग केल्याचे फिर्यादीत नमूद करण्यात आले आहे.

यानंतर गुंतवलेली रक्कम व परतावा न मिळाल्याने आपली फसवणूक झाल्याचे लक्षात आल्यानंतर फिर्यादी यांनी दि. २२ जून २०२६ रोजी सायबर पोलीस ठाण्यात तक्रार दाखल केली.

या प्रकरणी पोलिसांनी भारतीय न्याय संहिता (BNS) कलम ३१८(४), ३२०, ३२१, ३३५, ३३६, ३४० तसेच माहिती तंत्रज्ञान कायदा कलम ६६ (सी) व ६६ (डी) अंतर्गत गुन्हा दाखल केला असून पुढील तपास सुरू आहे.

सायबर पोलिसांचे आवाहन :
गुंतवणुकीवर अवास्तव परतावा, अनोळखी ॲप्स किंवा सोशल मीडियावरील आर्थिक ऑफर्सवर विश्वास ठेवू नये. कोणतीही ऑनलाईन गुंतवणूक करण्यापूर्वी संबंधित प्लॅटफॉर्मची पडताळणी करावी.