काक्रंबा परिसरात शेतकऱ्यांच्या विहरीवरील सोलार यंत्रणेचे तांब्याचे वायर चोरीला; अज्ञाताविरुद्ध गुन्हा दाखल- शेतकऱ्यांमध्ये भीतीचे वातावरण-Tuljapur Crime News Live
तुळजापूर/ प्रतिनिधी : तुळजापूर तालुक्यातील काक्रंबा परिसरात शेतकऱ्यांच्या शेतातील विहरीवर बसविण्यात आलेल्या सोलार यंत्रणेच्या इलेक्ट्रिक तांब्याच्या वायरची चोरी झाल्याची घटना समोर आली आहे. या प्रकरणी तुळजापूर पोलीस ठाण्यात अज्ञात व्यक्तीविरुद्ध गुन्हा नोंद करण्यात आला आहे.
याबाबत मिळालेल्या माहितीनुसार, फिर्यादी शाम निवृत्ती ढेरे (वय 48, रा. काक्रंबा, ता. तुळजापूर, जि. धाराशिव) तसेच इतर शेतकऱ्यांच्या शेतातील विहरीवर बसविण्यात आलेल्या सोलार यंत्रणेवरील एकूण 397 मीटर इलेक्ट्रिक तांब्याचे वायर अज्ञात चोरट्यांनी चोरून नेल्याची घटना घडली. चोरीस गेलेल्या मालाची अंदाजे किंमत 27 हजार 790 रुपये इतकी असल्याचे फिर्यादीत नमूद करण्यात आले आहे.
ही घटना दि. 30 मे 2026 रोजी सायंकाळी 6.00 वाजल्यापासून ते 31 मे 2026 रोजी सकाळी 7.00 वाजेच्या दरम्यान घडल्याचे सांगण्यात आले. घटनेनंतर परिसरातील शेतकऱ्यांमध्ये चिंतेचे वातावरण निर्माण झाले असून, शेतीसाठी वापरल्या जाणाऱ्या सोलार यंत्रणांच्या सुरक्षेचा प्रश्न पुन्हा ऐरणीवर आला आहे.
फिर्यादी शाम ढेरे यांनी दि. 09 जून 2026 रोजी दिलेल्या प्रथम खबरेवरून तुळजापूर पोलीस ठाण्यात भा.न्या.सं. कलम 303(2) अन्वये अज्ञात आरोपीविरुद्ध गुन्हा दाखल करण्यात आला असून पुढील तपास पोलीस करत आहेत.
दरम्यान, परिसरातील शेतकऱ्यांनी शेतातील सोलार उपकरणे व विद्युत साहित्य सुरक्षित ठेवण्यासाठी अतिरिक्त उपाययोजना करण्याची मागणी केली आहे.
0 Comments