आनंदाचा शिधा’चे वितरण महिनाभर सुरु राहणार

 ‘आनंदाचा शिधा’चे वितरण महिनाभर सुरु राहणार 

मुंबई: दिवाळीनुसार राज्यातील पाञ शिधापत्रिकाधारकांना गुढीपाडवा व डॉ. बाबासाहेब आंबेडकर जयंतीला राज्य शासनाने आनंदाचा शिधा देण्याची घोषणा केली आहे. त्यानुसार गुढीपाडव्यापासून पुढील महिन्याभर पात्र शिधापत्रिकाधारकांना आनंदाचा शिधा वितरित केला जाणार असल्याची  माहिती अन्न नागरी पुरवठा व ग्राहक संरक्षण विभागाने  प्रसिद्धीस दिलेल्या पत्रकान्वये कळविले आहे. त्यानुसार काही जिल्ह्यात वितरण सुरू झाले आहे. गुढीपाडवा सणाच्या आठ दिवस अगोदर शासकीय कर्मचाऱ्यांनी संप पुकारल्यामुळे सरकारच्या वतीने देण्यात येणारा आनंदाचा शिधा गुढीपाडवा सण संपला तरी त्यांच्यापर्यंत पोहोचला नसल्याने नागरिकांमधून संताप व्यक्त केला जात आहे.

राज्यातील सार्वजनिक वितरण व्यवस्थेअंतर्गत अंत्योदय अन्न योजना, प्राधान्य कुटुंब, औरंगाबाद व अमरावती विभागातील सर्व जिल्हे व नागपूर विभागातील वर्धा, अशा १४ शेतकरी आत्महत्याग्रस्त जिल्ह्यांतील एपीएल (केशरी) शेतकरी शिधा पत्रिकाधारकांना गुढीपाडवा, डॉ. बाबासाहेब आंबेडकर जयंती इत्यादी सणांनिमित्त नियमित अन्नधान्याव्यतिरिक्त प्रत्येकी १ किलो रवा, १ किलो चणाडाळ, १ किलो साखर व १ लिटर खाद्यतेल या ४ शिधा जिन्नसांचा समावेश असलेला "आनंदाचा शिधा" संच उपलब्ध करुन देण्याचा निर्णय २२ फेब्रुवारी २०२३ रोजीच्या शासन निर्णयान्वये घेण्यात आला आहे. त्यानुसार काही जिल्ह्यांत वितरण सुरू झाले आहे.

यापूर्वी सन २०२२ मधील दिवाळी सणानिमित्त माहे ऑक्टोबर २०२२ ते नोव्हेंबर २०२२ या कालावधीत सर्व पात्र शिधापत्रिकाधारकांना "आनंदाचा शिध" संचाचे वितरण करण्यात आले होते, असे अन्न व नागरी पुरवठा व ग्राहक संरक्षण विभाग यांनी प्रसिद्धी पत्रकान्वये कळविले आहे.