साडेतीन शक्तिपीठांतील कुंकू धाराशिव नगरीत दाखल

साडेतीन शक्तिपीठांतील कुंकू धाराशिव नगरीत दाखल
ठाकरेनगर नवरात्र महोत्सव समितीमार्फत घरोघरी होणार घटस्थापना साहित्य वाटप

धाराशिव- शहरातील बाळासाहेब ठाकरेनगर येथील नवरात्र महोत्सव समितीच्या वतीने घटस्थापनेसाठी घरोघरी घटस्थापना, ओटीभरण व पूजाविधीचे साहित्य भेट देण्यात येत आहे. मंडळाच्या वतीने गेली 23 वर्षांपासून ही परंपरा जपली असून यावर्षी महिला भाविकांसाठी महत्वाच्या योजनेचा लाभ मिळवून देण्यासाठी विशेष शिबिराचे आयोजन करण्यात आले असल्याची माहिती नवरात्र उत्सव समितीचे सर्वेसर्वा प्रशांत (बापू) साळुंके यांनी दिली.

धाराशिव येथील ठाकरेनगर शारदीय नवरात्र महोत्सवाची परंपरा प्रशांत साळुंके यांनी गेल्या 23 वर्षांपासून अखंडितपणे जपली आहे. दरवर्षी महाराष्ट्रातील साडेतीन शक्तीपीठात स्वतः जाऊन श्री. साळुंके हे देवीचरणीचे कुंकू घेऊन धाराशिव नगरीत दाखल झाले. येथील शारदीय नवरात्र महोत्सवाची जय्यत तयारी सुरू असून कोल्हापूरच्या अंबाबाई मंदिराचा देखावा यावर्षी तयार करण्यात आला आहे.

यंदाच्या नवरात्र उत्सवाचे वैशिष्ट्य म्हणजे घटस्थापनेपासून घटोथापनापर्यंत सर्व धार्मिक विधी दुर्गांच्या हस्ते करण्यात येणार आहेत. त्याचबरोबर महिलांसाठी विविध धार्मिक कार्यक्रम तसेच उद्योग सुरू करू इच्छिणाऱ्या महिला भगिनींकरिता व्यवसाय प्रशिक्षण आणि तात्काळ कर्ज उपलब्ध करून देण्यात येणार असल्याचे ठाकरेनगर नवरात्र महोत्सव समितीचे संस्थापक अध्यक्ष प्रशांत साळुंके यांनी सांगितले.

विविध प्रशिक्षण व स्पर्धाचे आयोजन

नवरात्र महोत्सव कालावधीत महिला, मुली  व विद्यार्थ्यांसाठी विविध कलांचे प्रशिक्षण तसेच खेळाच्या स्पर्धा घेण्यात येणार आहेत. यामध्ये सुंदर हस्ताक्षर, रांगोळी, महिला व मुलींसाठी स्व संरक्षणाचे प्रशिक्षण,  उद्योग आधार तसेच दांडिया प्रशिक्षण वर्गाचे आयोजन करण्यात आले आहे. त्याचबरोबर धावणे, संगीत खुर्ची, रांगोळी, पिठातील चॉकलेट शोधणे, लिंबू चमचा अशा स्पर्धा घेण्यात येणार आहेत. 

महिलांसाठी विविध धार्मिक कार्यक्रम

ठाकरेनगर नवरात्र महोत्सव समितीच्या वतीने महिलांसाठी विविध धार्मिक कार्यक्रमांचे आयोजन करण्यात आले आहे.  यात आराधी गीतांचा मेळा,  घागरी फुंकणे, कुंकू मार्चन, सप्तशती पठण असे विविध कार्यक्रम होणार आहेत. या कार्यक्रमाचा महिला भाविकांनी लाभ घ्यावा असे आवाहन ठाकरेनगर नवरात्र महोत्सव समितीचे संस्थापक अध्यक्ष प्रशांत साळुंके यांनी केले आहे.

प्रतिनिधी रुपेश डोलारे धाराशिव