चिवरी पाटी ते महालक्ष्मी मंदिर रस्त्याची दुरावस्था कायम , ग्रामस्थांसह भाविकांचे मोठे हाल
चिवरी : तुळजापूर तालुक्यातील चिवरी येथील महालक्ष्मी मंदिर रस्त्याची प्रचंड दुरावस्था झाली आहे. येथील नळदुर्ग -तुळजापूर महामार्गावरील चिवरी पाटी ते महालक्ष्मी मंदिर रस्त्यावर जागोजागी मोठमोठे खड्डे पडले आहेत त्यामुळे वाहनधारकासह भाविकांना अनेक समस्यांचा सामना करावा लागत आहे. महालक्ष्मीच्या दर्शनासाठी मंगळवार शुक्रवार अमावस्या, पौर्णिमेला हजारो भाविक दाखल होतात मात्र या रस्त्याच्या दुरावस्थेमुळे भाविकांना नाहक त्रास सहन करावा लागत आहे. त्यामुळे या रस्त्याला कोणी वाली आहे का नाही? असा संतप्त सवाल भाविकातून उपस्थित केला जात आहे,याप्रकरणी संबंधित वरिष्ठ अधिकाऱ्यांनी तात्काळ लक्ष देऊन रस्त्याची दुरुस्ती करावी अशी मागणी होत आहे.
चिवरी येथील महालक्ष्मी दर्शनासाठी राज्यासह परराज्यातील भाविक मोठ्या संख्येने येतात मात्र मुख्य मार्ग नळदृग तुळजापूर रोडवरील चिवरी पाटी ते महालक्ष्मी मंदिर या तीन किलोमीटर रस्त्याची अवस्था अत्यंत बिकट झाली आहे, या रस्त्याने पायी चालणेही कठीण होऊन बसले आहे. रस्त्यात खड्डा की खड्ड्यात रस्ता?अशी अवस्था झाली आहे. यामुळे वाहनधारक भाविकांसह ग्रामस्थांना जीव मुठीत धरून प्रवास करावा लागत आहे. तुळजापूर हे तालुक्याचे ठिकाण असल्याने येथे शासकीय कामासाठी ग्रामस्थांना जावे लागते त्यामुळे या रस्त्यावर कायम वर्दळ असते या तीन किलोमीटरच्या रस्त्याचा प्रवास करण्यासाठी अर्धा तास वेळ लागत आहे .जागोजागी खड्डे पडल्याने वाहनेही खिळखळी होत आहेत. या रस्त्यावर अनेक दुचाकी घसरून पडण्याचे अपघातही घडले आहेत. आणखीन मोठ्या अपघातांला प्रशासन आमंत्रण देत आहे की काय ? असा संतप्त सवाल भाविकांसह ग्रामस्थातून उपस्थित केला जात आहे . याप्रकरणी संबंधित विभागाच्या वरिष्ठ अधिकारी ,ग्रामपंचायतने लक्ष घालून रस्त्याची तात्काळ दुरुस्ती करावी अशी मागणी भाविकांसह ग्रामस्थातून होत आहे.
0 Comments