परंडाच्या काही गावात आढळला बिबट्या शेतकरी व ग्रामस्थांनी सतर्क राहावे;वनविभागाचे आवाहन

 🔴परंडाच्या काही गावात आढळला बिबट्या शेतकरी व ग्रामस्थांनी सतर्क राहावे;वनविभागाचे आवाहन

धाराशिव दि.२७:- परंडा तालुक्यात कपिलापुरी, सोनारी, रूई खामसगाव, सोनगिरी, कारंजा, भोंजा, वांगेगव्हाण, लोणी व खासगाव या गावांमध्ये बिबट्या हा वन्यप्राणी २१ नोव्हेंबर रोजी आढळून आला आहे.वन विभागाच्या अधिकारी/ कर्मचारी यांनी मोक्यावर जाऊन पाहणी केली असता काही पाळीव जनावरांवर बिबट्याने हल्ला करून ठार मारल्याचे दिसून आले. 

खबरदारीचा उपाय म्हणून कपिलापुरी, सोनारी, खामसगाव, रुई, सोनगिरी, कारंजा, भोजा, वांगेगव्हाण, लोणी व खासगावासह इतरही गावात वन कर्मचारी तैनात केले असून ग्रामस्थांना व शेतकऱ्यांना सतर्क राहण्याचे आवाहन वन विभागाने केले आहे. 

शेतकऱ्यांनी शेतात रात्री मुक्काम करू नये. जनावरे बंदिस्त गोठ्यात अथवा निवाऱ्यात बांधावे.लहान मुलांना एकट्याने फिरू देऊ नये.अफवांवर विश्वास ठेवू नये. ज्या गाव व शिवारात बिबट्या आढळल्यास संबंधित गावाच्या सरपंचांना कळवावे.अफवा पसरवण्यापासून दूर राहून पुढील संभाव्य मानवी व पाळीव प्राणी यांची होणारी जीवित हानी टाळावी.असे आवाहन सहाय्यक वनसंरक्षक (रोहयो व कॅम्पा) श्री.व्ही.बी.तांबे यांनी केले आहे.