गवळेवाडीतील थरकाप उडवणारी घटना : १३ महिन्यांच्या पुतणीच्या हत्येप्रकरणी चुलत्यास सात दिवसांची पोलीस कोठडी-Police Cusdy
तुळजापूर (प्रतिनिधी) – तुळजापूर तालुक्यातील गवळेवाडी शिवारात उघडकीस आलेल्या १३ महिन्यांच्या चिमुकलीच्या निर्घृण हत्येप्रकरणी न्यायालयाने आरोपी चुलत्याला सात दिवसांची पोलीस कोठडी सुनावली आहे. या अमानुष घटनेमुळे संपूर्ण परिसरात संताप आणि शोककळा पसरली आहे.
मयत चिमुकलीचे नाव आराध्या नामदेव माने (वय १३ महिने) असे असून, आरोपीचे नाव शंकेश्वर माने असे आहे. कौटुंबिक वादातून आणि चारित्र्यावर संशय घेत आरोपीने ही टोकाची पावले उचलल्याचे प्राथमिक तपासात समोर आले आहे.
संशयातून घडली क्रूर हत्या
पोलीस सूत्रांकडून मिळालेल्या माहितीनुसार, आरोपीला ही मुलगी आपल्या भावाच्या रक्ताची नसल्याचा संशय होता. या संशयातूनच त्याने संतापाच्या भरात चिमुकलीचा गळा आवळून खून केला. त्यानंतर गुन्हा लपवण्यासाठी मृतदेहाचे सात तुकडे केल्याची धक्कादायक बाब उघड झाली आहे.
२४ तासांत अटक
घटनेची माहिती मिळताच तामलवाडी पोलीस स्टेशन येथील पोलिसांनी तातडीने तपासाची चक्रे फिरवली आणि अवघ्या २४ तासांत आरोपीला अटक केली. रविवारी आरोपीला तुळजापूर न्यायालय येथे हजर केले असता न्यायालयाने सात दिवसांची पोलीस कोठडी सुनावली.
पुरावे शोधण्याचे काम सुरू
हत्येसाठी वापरलेले सत्तूर आरोपीने जवळच्या विहिरीत फेकून दिल्याची कबुली दिली आहे. तसेच मृतदेह पुरण्यासाठी वापरलेले फावडे आणि कुदळ यांचा शोध पोलीस घेत आहेत. अधिक तपास सुरू असून, घटनास्थळी पंचनामा करण्यात आला आहे.
दि. १ रोजी तहसीलदारांच्या उपस्थितीत पंचनामा करून शवविच्छेदन करण्यात आले. सायंकाळी अत्यंत शोकाकुल वातावरणात आराध्याचे अंत्यसंस्कार करण्यात आले.
परिसरात संतापाची लाट
या अमानुष घटनेमुळे गवळेवाडी परिसरात तीव्र संताप व्यक्त केला जात आहे. निरपराध चिमुकलीच्या हत्येमुळे नागरिक हळहळ व्यक्त करत असून, आरोपीस कठोरात कठोर शिक्षा व्हावी, अशी मागणी होत आहे.
पोलीस या प्रकरणाचा सखोल तपास करत असून, पुढील काही दिवसांत अधिक माहिती समोर येण्याची शक्यता आहे.
0 Comments