सोलापूर-हैद्राबाद महामार्गावर दरोडा; दुकानातीलच कामगार ठरला सूत्रधार – स्थानिक गुन्हे शाखेची धडाकेबाज कामगिरी -Dharashiv News
📍 धाराशिव | प्रतिनिधी : सोलापूर-हैद्राबाद महामार्गावरील दाळींब फाट्याजवळ घडलेल्या धाडसी दरोड्याच्या गुन्ह्याचा धाराशिव स्थानिक गुन्हे शाखेने (LCB) अवघ्या अवघ्या काही तासांत छडा लावला आहे. या प्रकरणातील सर्वात धक्कादायक बाब म्हणजे, ज्या दुकानातून फिर्यादीने पैसे घेतले, त्याच दुकानातील १९ वर्षीय कामगाराने आपल्या साथीदारांच्या मदतीने हा संपूर्ण कट रचल्याचे पोलीस तपासात उघड झाले आहे.
दिनांक २८ मार्च २०२६ रोजी हृषिकेश जाधव (रा. लातूर) हे मुरूम येथील ‘उज्वला किराणा’ दुकानात माल उतरवून १,१४,००० रुपये रोख रक्कम घेऊन परतत होते. यावेळी दाळींब फाट्याजवळ ६ ते ७ अज्ञात इसमांनी त्यांच्या वाहनाला अडवले. आरोपींनी फिर्यादी व त्यांच्या चालकाला जबर मारहाण करून त्यांच्याकडील रोख रक्कम लुटून नेली.
या प्रकरणी मुरूम पोलीस ठाण्यात गुन्हा रजिस्टर क्रमांक ७७/२०२६ अन्वये दरोड्याचा गुन्हा दाखल करण्यात आला होता.
घटनेचे गांभीर्य लक्षात घेऊन पोलीस अधीक्षक श्रीमती रितू खोखर यांनी स्थानिक गुन्हे शाखेला तपासाचे आदेश दिले. तांत्रिक विश्लेषण व गुप्त माहितीच्या आधारे पोलिसांनी दोन संशयितांना ताब्यात घेतले. चौकशीदरम्यान या गुन्ह्याचा मुख्य सूत्रधार अभिषेक राजेंद्र कावडे (वय १९, रा. कंटेकूर) असल्याचे निष्पन्न झाले.
अभिषेक हा ‘उज्वला किराणा’ दुकानात काम करत होता. फिर्यादीकडे मोठी रक्कम असल्याचे पाहून त्याने आपल्या साथीदारांना माहिती दिली आणि दरोड्याचा कट रचला. आरोपींनी दुचाकी व पांढऱ्या रंगाच्या इनोव्हा कारच्या साहाय्याने फिर्यादीच्या गाडीचा पाठलाग करून दरोडा टाकला.
पोलिसांनी या प्रकरणात खालील दोन आरोपींना अटक केली आहे:
🔹 अभिषेक राजेंद्र कावडे (वय १९, रा. कंटेकूर)
🔹 दत्ता व्यंकट जमादार (वय ३३, रा. कंटेकूर)
त्यांच्याकडून २०,००० रुपये रोख रक्कम व दोन मोबाईल असा एकूण ४२,००० रुपयांचा मुद्देमाल जप्त करण्यात आला आहे. या गुन्ह्यातील इतर सहा आरोपी सध्या फरार असून त्यांचा शोध पोलीस घेत आहेत.
ही कारवाई पोलीस अधीक्षक श्रीमती रितू खोखर व अपर पोलीस अधीक्षक श्रीमती शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सुदर्शन कासार व त्यांच्या पथकाने यशस्वीरित्या पार पाडली.
👉 अवघ्या काही तासांत गुन्ह्याचा छडा लावल्यामुळे धाराशिव पोलिसांच्या कार्यक्षमतेचे पुन्हा एकदा दर्शन घडले असून नागरिकांचा विश्वास अधिक दृढ झाला आहे.
0 Comments