मस्साजोगमध्ये धक्कादायक निकाल, सरपंचपदाच्या पोटनिवडणुकीत संतोष देशमुख यांच्या पत्नीचा पराभव-Sarpanch Santosh Desmukh Beed News 

बीड : केज तालुक्यातील मसाजोग येथील ग्रामपंचायत सरपंच पदाच्या निवडणुकीचा निकाल जाहीर झाला असून या निवडणुकीत स्वरूपानंद देशमुख यांनी 92 मतांनी विजय मिळवत सरपंचपदावर आपला दावा मजबूत केला आहे. विशेष म्हणजे दिवंगत सरपंच संतोष देशमुख यांच्या पत्नी आश्विनी देशमुख यांचा या निवडणुकीत पराभव झाला आहे.

मसाजोग गावात सरपंच संतोष देशमुख यांच्या हत्येनंतर हे पद रिक्त झाले होते. या पार्श्वभूमीवर 28 एप्रिल रोजी मतदान प्रक्रिया पार पडली. गावातील एकूण 2 हजार 84 मतदारांपैकी तब्बल 1 हजार 744 मतदारांनी मतदानाचा हक्क बजावला होता. त्यामुळे सुमारे 84 टक्के इतके लक्षणीय मतदान नोंदवले गेले.

निवडणुकीत आश्विनी देशमुख आणि स्वरूपानंद देशमुख यांच्यात थेट लढत झाली होती. सहानुभूतीची लाट आश्विनी देशमुख यांच्या बाजूने जाईल, अशी चर्चा गावात होती. मात्र प्रत्यक्ष निकालात ग्रामस्थांनी स्वरूपानंद देशमुख यांच्यावर विश्वास दाखवत त्यांना कौल दिला.

आज सकाळी 10 वाजल्यापासून तहसील कार्यालयात मतमोजणी प्रक्रिया पार पडली. सुरुवातीपासूनच स्वरूपानंद देशमुख आघाडीवर असल्याचे चित्र दिसून आले. अखेरीस त्यांनी 92 मतांच्या फरकाने विजय मिळवत सरपंचपद पटकावले.

या निकालामुळे मसाजोग गावातील राजकीय समीकरणांमध्ये मोठा बदल झाल्याचे मानले जात आहे. सहानुभूतीच्या मुद्द्यापेक्षा स्थानिक विकास, नेतृत्व आणि संघटनशक्ती या मुद्द्यांना ग्रामस्थांनी अधिक प्राधान्य दिल्याचे या निकालातून स्पष्ट झाले आहे.