तुळजापूर तालुक्यात भीषण अपघात; टॅम्पोच्या धडकेत १७ वर्षीय तरुणाचा मृत्यू, एक जखमी-Tuljapur Motorcyle Accident News
तुळजापूर /प्रतिनिधी : धाराशिव जिल्ह्यातील तुळजापूर तालुक्यातील सलगरा ते किलज मार्गावर भीषण अपघात घडला असून, टॅम्पोच्या जोरदार धडकेत १७ वर्षीय तरुणाचा मृत्यू झाला तर दुसरा गंभीर जखमी झाला आहे. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, दि. २ एप्रिल २०२६ रोजी दुपारी सुमारे १ वाजण्याच्या सुमारास उत्कर्ष भरत गवळी (वय १७, रा. किलज) व त्याचा मित्र अविष्कार उर्फ कुंदन धनाजी ढाले (वय १७, रा. किलज) हे दोघे मोटरसायकल (क्र. MH 06 V 9662) वरून सलगरा येथून किलजकडे जात होते.
दरम्यान, समोरून येणाऱ्या टॅम्पो (क्र. MH 25 P 2630) चालक नागनाथ प्रभाकर कानडे (रा. चिकुंद्रा, ता. तुळजापूर) याने आपला वाहन हायगयी व निष्काळजीपणे चालवून मोटरसायकलला जोरदार धडक दिली.
या अपघातात अविष्कार ढाले यांना गंभीर दुखापत झाली. त्यांना तात्काळ उपचारासाठी हलविण्यात आले, मात्र उपचारादरम्यान त्यांचा मृत्यू झाला. तर उत्कर्ष गवळी हा गंभीर जखमी असून त्याच्यावर उपचार सुरू आहेत.
या घटनेनंतर परिसरात शोककळा पसरली असून, तरुण वयातच झालेल्या मृत्यूमुळे कुटुंबीयांवर दुःखाचा डोंगर कोसळला आहे.
या प्रकरणी जखमी उत्कर्ष गवळी यांनी ११ एप्रिल २०२६ रोजी दिलेल्या फिर्यादीवरून नळदुर्ग पोलीस ठाण्यात आरोपी चालक नागनाथ कानडे याच्याविरुद्ध भारतीय न्याय संहिता कलम १०६(१), २८१, १२५(अ), १२५(ब) तसेच मोटार वाहन कायदा कलम १८४ अन्वये गुन्हा नोंदवण्यात आला आहे.
पोलिसांकडून पुढील तपास सुरू असून निष्काळजी वाहनचालकांवर कठोर कारवाई करण्याचे संकेत देण्यात आले आहेत.
0 Comments