नळदुर्ग : भरधाव मालवाहू वाहनाची दुचाकीला धडक; मुर्टा येथील 50 वर्षीय व्यक्तीचा मृत्यू-Accident News
धाराशिव : तुळजापूर तालुक्यातील मुर्टा शिवारात भरधाव मालवाहू वाहनाने ॲक्टीव्हाला जोरदार धडक दिल्याने एका 50 वर्षीय व्यक्तीचा दुर्दैवी मृत्यू झाल्याची घटना समोर आली आहे. या प्रकरणी नळदुर्ग पोलीस ठाण्यात मालवाहू वाहन चालकाविरुद्ध गुन्हा दाखल करण्यात आला आहे.
पोलीसांनी दिलेल्या माहितीनुसार, मयत मोतीराम महादेव अंगुले (वय 50, रा. मुर्टा ता. तुळजापूर जि. धाराशिव) हे दि. 13 मे 2026 रोजी रात्री सुमारे 9 वाजण्याच्या सुमारास त्यांच्या ॲक्टीव्हा दुचाकी क्रमांक एमएच 25 बीएच 9204 वरून जात होते. यावेळी मुर्टा शिवारातील नळदुर्ग ते व्होर्टी जाणाऱ्या रस्त्यावर हॉटेल जगदंबा जवळ मालवाहतूक वाहन क्रमांक एमएच 25 एजे 8107 च्या चालकाने वाहन भरधाव व निष्काळजीपणे चालवत त्यांच्या दुचाकीला जोरदार धडक दिली.
या भीषण अपघातात मोतीराम अंगुले गंभीर जखमी झाले. अपघातानंतर संबंधित वाहन चालकाने जखमींना उपचारासाठी रुग्णालयात न नेता घटनास्थळावरून पलायन केल्याचे फिर्यादीत नमूद करण्यात आले आहे. गंभीर जखमी अवस्थेत असलेल्या मोतीराम अंगुले यांचा उपचारापूर्वीच मृत्यू झाला.
या प्रकरणी फिर्यादी अल्फा मोतीराम अंगुले (वय 40, रा. मुर्टा ता. तुळजापूर जि. धाराशिव) यांनी दि. 23 मे 2026 रोजी नळदुर्ग पोलीस ठाण्यात प्रथम खबर दिली. त्यानुसार संबंधित मालवाहू वाहन चालकाविरुद्ध भारतीय न्याय संहिता कलम 106(1), 281 तसेच मोटार वाहन कायद्यातील कलम 134(अ)(ब), 184 अन्वये गुन्हा दाखल करण्यात आला आहे.
या घटनेचा पुढील तपास नळदुर्ग पोलीस ठाणे करीत आहे.
0 Comments