इटकळ येथे दोन गटात तुबंळ हाणामारी; नळदुर्ग पोलीस ठाण्यामध्ये परस्परविरोधी गुन्हे दाखल-Breaking News

इटकळ येथे दोन गटात तुबंळ हाणामारी; नळदुर्ग पोलीस ठाण्यामध्ये परस्परविरोधी गुन्हे दाखल-Breaking News 

धाराशिव-प्रतिनिधी:  तुळजापूर तालुक्यातील इटकळ येथे मोटारसायकलचा किरकोळ वाद चांगलाच पेटल्याने दोन गटांमध्ये तुफान हाणामारी झाली. या प्रकरणी दोन्ही बाजूंकडून परस्परविरोधी फिर्यादी दाखल करण्यात आल्या असून नळदुर्ग पोलीस ठाणे येथे दोन स्वतंत्र गुन्हे नोंद करण्यात आले आहेत.

पोलीसांनी दिलेल्या माहितीनुसार, दि. १३ मे २०२६ रोजी रात्री साडेदहा वाजण्याच्या सुमारास इटकळ येथील साई मंगल कार्यालय परिसरात हा प्रकार घडला. मोटारसायकल अंगावर आल्याच्या कारणावरून सुरू झालेला वाद पुढे दोन गटांतील मारहाणीपर्यंत पोहोचला.

पहिल्या फिर्यादीत महेबुब सत्तार शेख (वय ४२, रा. इटकळ) यांनी नमूद केले आहे की, ते व त्यांचे मित्र शामराव क्षीरसागर मोटारसायकलवरून जात असताना आरोपी महेश प्रभाकर पाटील, अजित अशोक पाटील, शैलेश्वर प्रभाकर पाटील, सोमनाथ पाटील, पप्पु पाटील (सर्व रा. नांदुरी), तसेच धनराज प्रभाकर कुताडे व संदीप चिनगुंडे (रा. अणदुर) यांनी गैरकायद्याची मंडळी जमवून शिवीगाळ केली. त्यानंतर लाथाबुक्यांनी व काठीने मारहाण करून जखमी केले तसेच जिवे मारण्याची धमकी दिल्याचा आरोप करण्यात आला आहे.

तर दुसऱ्या फिर्यादीत महेश प्रभाकर पाटील (वय ५३, रा. नांदुरी) यांनी म्हटले आहे की, हारुण शेख, दौला शेख, अफसर शेख, तौफीक शेख, जहर शेख, समीर मुजावर यांच्यासह एकूण २१ जणांनी मोटारसायकलला कट मारल्याच्या कारणावरून वाद घालत मारहाण केली. या घटनेत अजित पाटील, शैलेश्वर पाटील, धनराज कुताडे व संदीप चिनगुंड यांनाही मारहाण झाल्याचे नमूद करण्यात आले आहे. तसेच वैशाली कुताडे यांच्या गळ्यातील सुमारे चार तोळ्यांचे मंगळसूत्र तुटून खाली पडल्याचाही उल्लेख फिर्यादीत करण्यात आला आहे.

या दोन्ही प्रकरणांमध्ये नळदुर्ग पोलीस ठाणे येथे भारतीय न्याय संहिता (BNS) अंतर्गत कलम 118(1), 115(2), 352, 351(2), 189(2), 190, 191(2), 191(3) तसेच दुसऱ्या गुन्ह्यात कलम 324(2) प्रमाणे गुन्हे दाखल करण्यात आले आहेत. पुढील तपास पोलीस करत आहेत.