गांजाच्या गुन्ह्याची माहिती पोलिसांना दिल्याच्या संशयातून तरुणास मारहाण; २५ लाखांच्या खंडणीची मागणी-Dharashiv Crime

गांजाच्या गुन्ह्याची माहिती पोलिसांना दिल्याच्या संशयातून तरुणास मारहाण; २५ लाखांच्या खंडणीची मागणी-Dharashiv Crime 

भूम : गांजाच्या गुन्ह्याची माहिती पोलिसांना दिल्याच्या संशयावरून एका तरुणाला शिवीगाळ करत मारहाण करून तब्बल २५ लाख रुपयांची खंडणी मागितल्याची धक्कादायक घटना उघडकीस आली आहे. याप्रकरणी भुम पोलीस ठाणे येथे चार जणांविरुद्ध गंभीर स्वरूपाचा गुन्हा दाखल करण्यात आला आहे.

पोलीसांनी दिलेल्या माहितीनुसार, फिर्यादी सुरेश शामराव पवार (वय ३६) यांनी २६ मे २०२६ रोजी प्रथम खबर दिली. त्यानुसार आरोपी दत्ता बिरु काळे, रावजी दत्ता काळे, सुब्राव रमेश काळे आणि बप्पा सवंत काळे यांनी १५ डिसेंबर २०२५ ते २९ एप्रिल २०२६ या कालावधीत फिर्यादीला वारंवार त्रास दिल्याचा आरोप आहे.

फिर्यादीने पोलिसांना दिलेल्या तक्रारीनुसार, आरोपींवर पूर्वी गांजासंदर्भातील गुन्हा दाखल असून त्या गुन्ह्याची माहिती पोलिसांना आपण दिल्याचा संशय आरोपींना होता. त्याच कारणावरून आरोपींनी फिर्यादीकडे २५ लाख रुपयांची मागणी केली. तसेच शिवीगाळ करून लाथाबुक्यांनी मारहाण करत जीवे मारण्याची धमकी दिल्याचेही तक्रारीत नमूद करण्यात आले आहे.

या प्रकरणी भुम पोलीस ठाणे येथे भारतीय न्याय संहिता कलम ३०८(३), ११५(२), ३५२, ३५१(३), ३२४(४), ३(५) सह ११५(अ)/११७ अन्वये गुन्हा दाखल करण्यात आला असून पुढील तपास पोलीस करत आहेत.