नळदुर्ग : चाकूचा धाक दाखवून तरुणीचे अपहरण; ६ लाखांचा मुद्देमाल लुटल्याप्रकरणी दोघांवर गुन्हा-Naldurg Police Station Crime News

नळदुर्ग : चाकूचा धाक दाखवून तरुणीचे अपहरण; ६ लाखांचा मुद्देमाल लुटल्याप्रकरणी दोघांवर गुन्हा-Naldurg Police Station Crime News 

धाराशिव : जिल्ह्यातील तुळजापूर तालुक्यात एका १९ वर्षीय तरुणीला चाकूने भोसकण्याची धमकी देत मारहाण करून तिच्याकडील रोख रक्कम व सोन्याचे दागिने जबरदस्तीने काढून घेत अपहरण केल्याची गंभीर घटना उघडकीस आली आहे. या प्रकरणी नळदुर्ग पोलीस ठाण्यात दोघांविरुद्ध गुन्हा दाखल करण्यात आला आहे.

पोलीसांनी दिलेल्या माहितीनुसार, आरोपी अभिषेक दिलीप जाधव व सोन्या जाधव, दोघेही रा. लिंबाळा (दै) तांडा, ता. औसा, जि. लातूर यांनी दि. ६ मे २०२६ रोजी पहाटे सुमारे ३ वाजण्याच्या सुमारास हलदरा तांडा, होर्टी शिवारात ही घटना घडवली.

फिर्यादी स्वाती शुभम चव्हाण (वय १९, रा. हावलदरा तांडा, होर्टी, ता. तुळजापूर, जि. धाराशिव) या शेत परिसरात असताना आरोपींनी त्यांना “तुला चाकूने भोसकून टाकू” अशी धमकी दिली. त्यानंतर हाताने मारहाण करून फिर्यादींकडील रोख १ लाख ३० हजार रुपये तसेच सुमारे १५ ग्रॅम वजनाचे सोन्याचे दागिने असा एकूण अंदाजे ६ लाख रुपयांचा मुद्देमाल जबरदस्तीने काढून घेतल्याचे फिर्यादीत नमूद करण्यात आले आहे.

यावेळी फिर्यादी आरडाओरडा करू नये म्हणून आरोपींनी त्यांना जबरदस्तीने गाडीत बसवून नेले व नंतर त्यांच्या मामाच्या घरासमोर सोडून दिल्याचेही तक्रारीत म्हटले आहे.

या प्रकरणी स्वाती चव्हाण यांनी दि. १२ मे २०२६ रोजी दिलेल्या फिर्यादीवरून नळदुर्ग पोलीस ठाणे येथे भारतीय न्याय संहिता (भा.न्या.सं.) कलम 119(1), 140(3), 333 व 3(5) अंतर्गत गुन्हा नोंद करण्यात आला असून पुढील तपास पोलीस करीत आहेत.