फोटो का काढला?’ या कारणावरून अल्पवयीनावर हल्ला; अज्ञातांविरुद्ध गुन्हा दाखल- धाराशिव जिल्ह्यातील घटना
धाराशिव/ प्रतिनिधी : "तू सुरेश पवार यांच्यासोबत फोटो का काढले?" या क्षुल्लक कारणावरून एका अल्पवयीन मुलासह त्याच्या मित्राला शिवीगाळ करत काठी, लाकडी फळी तसेच लाथाबुक्क्यांनी मारहाण केल्याची घटना भुम बसस्थानक परिसरात घडली. या प्रकरणी अज्ञात आरोपींविरुद्ध भुम पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, सख्या महाझा काळे (वय १६ वर्षे, रा. वालवड ता. भुम, सध्या रा. गोलेगाव ता. भुम) हे त्यांचे मित्र अभिमान पवार यांच्यासह दि. ६ जून २०२६ रोजी रात्री सुमारे ९ वाजण्याच्या सुमारास भुम बसस्थानकाच्या प्रवेशद्वारासमोर उभे होते. त्यावेळी अज्ञात इसमांच्या टोळक्याने त्यांना अडवून, "तू सुरेश पवार यांच्यासोबत फोटो का काढले?" असा जाब विचारला.
यानंतर आरोपींनी गैरकायद्याची मंडळी जमवून दोघांना शिवीगाळ केली. तसेच लाथाबुक्क्यांनी मारहाण करत काठी व लाकडी फळीने हल्ला करून जखमी केल्याचे फिर्यादीत नमूद करण्यात आले आहे. अचानक झालेल्या या हल्ल्यामुळे परिसरात काही काळ तणावाचे वातावरण निर्माण झाले होते.
या घटनेप्रकरणी सख्या महाझा काळे यांनी ७ जून रोजी भुम पोलिस ठाण्यात फिर्याद दिली. त्यावरून अज्ञात आरोपींविरुद्ध भारतीय न्याय संहितेच्या कलम ११८(१), ११५(२), १२६(२), १८९(२), १९१(२), १९१(३) आणि १९० अन्वये गुन्हा दाखल करण्यात आला आहे.
पोलिसांनी अज्ञात आरोपींचा शोध सुरू केला असून परिसरातील सीसीटीव्ही फुटेज आणि अन्य पुराव्यांच्या आधारे पुढील तपास सुरू आहे.
0 Comments