तुतारी-संबळाच्या निनादात नवागतांचे जल्लोषात स्वागत; न.प. प्रा. शाळा क्र.२ मध्ये प्रवेशोत्सव उत्साहात
तुळजापूर, दि. १५ : तुळजापूर येथील नगरपरिषद प्राथमिक शाळा क्रमांक २ येथे शाळा प्रवेशोत्सव मोठ्या उत्साहात साजरा करण्यात आला. इयत्ता पहिलीत प्रवेश घेणाऱ्या नवागत विद्यार्थ्यांचे पारंपरिक पद्धतीने तुतारी व संबळाच्या निनादात स्वागत करण्यात आले. शाळेच्या परिसरात आनंदाचे आणि उत्साहाचे वातावरण निर्माण झाले होते.
यावेळी इयत्ता पहिलीतील विद्यार्थ्यांचे औक्षण करून त्यांच्या पायांचे ठसे घेण्यात आले. तसेच विद्यार्थ्यांना फुले, पेढे देऊन शाळेत स्वागत करण्यात आले. शाळेच्या पहिल्याच दिवशी नव्या विद्यार्थ्यांमध्ये उत्सुकता आणि आनंद दिसून आला.
कार्यक्रमादरम्यान इयत्ता पहिली ते सातवीच्या विद्यार्थ्यांना शासनाकडून मोफत पाठ्यपुस्तकांचे वाटप करण्यात आले. तसेच पालक मेळाव्याचे आयोजन करून विद्यार्थ्यांच्या शिक्षणात पालकांच्या सहभागाचे महत्त्व अधोरेखित करण्यात आले.
विशेष म्हणजे, इयत्ता पहिलीत प्रवेश घेतलेल्या सर्व विद्यार्थ्यांना भाजपा जिल्हा कोषाध्यक्ष नागेश नाईक यांच्या वतीने स्कूलबॅगसह शैक्षणिक साहित्याची किट वाटप करण्यात आली. त्यामुळे पालक आणि विद्यार्थ्यांनी समाधान व्यक्त केले.
शाळेत आकर्षक सेल्फी पॉईंटही उभारण्यात आला होता. विद्यार्थी आणि पालकांनी मोठ्या उत्साहाने सेल्फी काढत प्रवेशोत्सवाचा आनंद लुटला.
या कार्यक्रमाला विरोधी पक्षनेते अमोल भैय्या कुतवळ, भाजपा जिल्हा कोषाध्यक्ष नागेश नाईक, शाळा व्यवस्थापन समिती अध्यक्ष लखन झाडपिडे, केंद्रप्रमुख मोहन भोसले, युवा नेते गुलचंद व्यवहारे, प्रसाद पानपुडे, पालक महादेव चोपदार, सेवानिवृत्त शिक्षक बापू शिंदे आदी उपस्थित होते. उपस्थित मान्यवरांनी विद्यार्थ्यांना शुभेच्छा देत शिक्षणात प्रगती करण्याचे आवाहन केले.
कार्यक्रमाच्या यशस्वी आयोजनासाठी मुख्याध्यापक गणेश रोचकरी तसेच सहशिक्षक महेंद्र पाटील, महेंद्र कावरे, बाळासाहेब जेटीथोर, सुरजमल शेटे, केरण लोहारे, सुज्ञानी गिराम, विद्यादेवी स्वामी आणि शिवा डाके यांनी परिश्रम घेतले.
0 Comments