PM Kisan : मोठी बातमी! प्रधानमंत्री किसान सन्मान निधीच्या 23व्या हप्त्याची तारीख निश्चित; 'या' तारखेला थेट खात्यात जमा होणार 2 हजार

PM Kisan : शेतकऱ्यांसाठी आनंदाची बातमी : प्रधानमंत्री किसान सन्मान निधीच्या 23व्या हप्त्याची तारीख निश्चित; 'या' तारखेला थेट खात्यात जमा होणार 2 हजार

मुंबई : प्रधानमंत्री किसान सन्मान निधी (PM Kisan) योजनेअंतर्गत एप्रिल 2026 ते जुलै 2026 या कालावधीतील 23वा हप्ता 20 जून 2026 रोजी पंतप्रधान नरेंद्र मोदी यांच्या हस्ते वितरित करण्यात येणार आहे. या निर्णयामुळे राज्यातील लाखो शेतकरी कुटुंबांना आर्थिक दिलासा मिळणार असून थेट लाभ हस्तांतरण (DBT) प्रणालीद्वारे रक्कम शेतकऱ्यांच्या बँक खात्यात जमा केली जाणार आहे.

राज्यातील पात्र शेतकरी कुटुंबांना या हप्त्याचा लाभ मिळणार असून यासाठी शासनाने निश्चित केलेल्या तीन महत्त्वाच्या अटी पूर्ण करणे आवश्यक आहे. यामध्ये भूमी अभिलेख नोंदणी अद्यावत असणे, बँक खाते आधारशी संलग्न असणे आणि ई-केवायसी (e-KYC) प्रमाणिकरण पूर्ण केलेले असणे या बाबींचा समावेश आहे.

या सर्व अटी पूर्ण केलेल्या सुमारे 91.19 लाख शेतकरी कुटुंबांना 23व्या हप्त्याचा लाभ दिला जाणार असून त्यापैकी 90.85 लाख शेतकऱ्यांच्या खात्यात सुमारे 1 हजार 870 कोटी रुपयांची रक्कम थेट जमा होणार असल्याची माहिती देण्यात आली आहे.

या निमित्ताने आयोजित कार्यक्रमाचे थेट प्रक्षेपण राज्यभरातील कृषी विज्ञान केंद्रे, जिल्हा व तालुका कृषी कार्यालये, ग्रामपंचायती, कृषी उत्पन्न बाजार समित्या, संशोधन केंद्रे, शेतकरी उत्पादक कंपन्या (FPC), शेतकरी उत्पादक संघटना (FPO) तसेच सहकारी पतसंस्था (PACS) येथे करण्यात येणार आहे. तसेच नागरिकांना नागरी सुविधा केंद्रांवरूनही कार्यक्रमात सहभागी होता येणार आहे.

कृषी विभाग, महसूल व वन विभाग तसेच ग्रामविकास विभाग यांच्या संयुक्त विद्यमाने राज्यभर हा कार्यक्रम आयोजित करण्यात येत असून जास्तीत जास्त शेतकरी बांधवांनी या कार्यक्रमात सहभागी व्हावे, असे आवाहन करण्यात आले आहे.

शेतकरी बांधवांना आपल्या खात्यातील हप्ता जमा झाल्याची माहिती संबंधित बँक खात्यात किंवा अधिकृत माध्यमांद्वारे तपासता येणार आहे.

रक्कम मिळवण्यासाठी e-KYC अनिवार्य (PM Kisan Samman Nidhi)

सरकारने पुन्हा एकदा स्पष्ट केले आहे की, पुढील हप्ता मिळवण्यासाठी शेतकऱ्यांनी 'ई-केवायसी' (e-KYC) पूर्ण करणे आवश्यक आहे. ज्या लाभार्थ्यांनी ही पडताळणी प्रक्रिया पूर्ण केलेली नाही, त्यांना कदाचित ही रक्कम मिळणार नाही. शेतकरी अधिकृत 'पीएम-किसान' पोर्टलवर जाऊन आपला आधार क्रमांक टाकून आणि OTP द्वारे प्रमाणीकरण करून 'ई-केवायसी' प्रक्रिया पूर्ण करू शकतात. पडताळणीसाठी अनेक पर्याय उपलब्ध आहे. ही प्रक्रिया सुलभ करण्यासाठी, सरकारने ई-केवायसी (e-KYC) पूर्ण करण्यासाठी तीन पद्धती उपलब्ध करून दिल्या आहेत

मोबाईल फोनद्वारे ओटीपी (OTP) आधारित ई-केवायसी

कॉमन सर्व्हिस सेंटर्स (CSCs) वर बायोमेट्रिक ई-केवायसी

मोबाईल ॲप्लिकेशनद्वारे चेहरा ओळखून (Face authentication) केली जाणारी ई-केवायसी

शेतकरी उपलब्ध असलेल्या यापैकी कोणत्याही पद्धतीची निवड करू शकतात.

लाभार्थी पेमेंटची स्थिती तपासू शकतात

पीएम-किसान (PM-Kisan) वेबसाइटद्वारे हप्त्याच्या पेमेंटची स्थिती तपासता येते. पेमेंटची स्थिती पाहण्यासाठी शेतकऱ्यांना "Beneficiary Status" (लाभार्थी स्थिती) हा पर्याय निवडावा लागेल आणि त्यांचा आधार क्रमांक किंवा बँक खात्याचा तपशील प्रविष्ट करावा लागेल.