भुममध्ये पोलिसांवर दगडफेक; शासकीय कामात अडथळा निर्माण केल्याप्रकरणी २०० हून अधिकांवर गुन्हा
धाराशिव : भुम शहरातील गोलाई चौक, भीमनगर परिसरात शुक्रवारी मध्यरात्री मोठा गोंधळ उडाल्याची घटना घडली. जमावाने पोलिसांवर दगडफेक करून शासकीय कामात अडथळा निर्माण केल्याप्रकरणी भुम पोलीस ठाण्यात ५८ नामनिर्देशित आरोपींसह सुमारे १५० अनोळखी इसमांविरोधात गंभीर कलमान्वये गुन्हा दाखल करण्यात आला आहे. या घटनेत पोलीस उपनिरीक्षक गंभीर जखमी झाल्याची माहिती समोर आली आहे.
पोलीसांनी दिलेल्या माहितीनुसार, दि.१५ मे २०२६ रोजी रात्री ११.०० वाजल्यापासून ते दि.१६ मे रोजी पहाटे १२.३० वाजेपर्यंत गोलाई चौक, भीमनगर येथे मोठ्या संख्येने लोक एकत्र जमले होते. परिस्थिती तणावपूर्ण होत असल्याने भुम पोलीस ठाण्याचे पोलीस उपनिरीक्षक प्रल्हाद कारभारी करोदे हे आपल्या सहकाऱ्यांसह घटनास्थळी पोहोचले होते.
यावेळी पोलिसांनी जमावाला शांततेचे आवाहन करून परिस्थिती नियंत्रणात आणण्याचा प्रयत्न केला. मात्र, जमावातील काही व्यक्तींनी पोलिसांवर दगडफेक सुरू केली. या दगडफेकीत पोलीस उपनिरीक्षक प्रल्हाद करोदे हे गंभीर जखमी झाले. तसेच काही चारचाकी वाहनांची तोडफोड करून वाहने पलटी करण्यात आल्याचे फिर्यादीत नमूद करण्यात आले आहे.
या प्रकरणी अक्की उर्फ अक्षय गायकवाड, संदीप सरवदे, रत्नदिप सरवदे, सचिन अशोक शिंदे, शाक्या शिंदे, मुकुंद लगाडे, अनिकेत थोरात, अक्षय युवराज गायकवाड, विकी उर्फ फक्कड गौतम जावळे यांच्यासह इतर अनेक नामनिर्देशित आरोपी व सुमारे १५० अनोळखी इसमांविरोधात गुन्हा दाखल करण्यात आला आहे.
फिर्यादी पोलीस उपनिरीक्षक प्रल्हाद करोदे यांनी दिलेल्या प्रथम खबरवरून भुम पोलीस ठाण्यात भारतीय न्याय संहिता कलम १०९, ११८(२), १३२, १२१(१), १८९, १९१(१), १९१(२), १९०, १९२, १९५, १९६ अन्वये गुन्हा नोंद करण्यात आला आहे.
घटनेनंतर परिसरात तणावाचे वातावरण निर्माण झाले असून पोलिसांनी अतिरिक्त बंदोबस्त तैनात केला आहे. पुढील तपास भुम पोलीस करत आहेत.
0 Comments