सोयाबीनचे भाव गडगडल्याने शेतकरी हवालदिल,ऐण सणासुदीत शेतकरी आथिर्क संकटात

तुळजापुर /बालाघाट न्युज टाईम्स :  खरीप हंगामातील सोयाबीन पिक कशेतकऱ्यांच्या हाती येण्याची वेळ जवळ आली आहे, त्यातच बाजारातील दरात मोठी घसरण सुरू आहे सोयाबीनचे दर पाच हजारावर येऊन ठेपले आहेत त्यामुळे शेतकऱ्यांमध्ये नाराजी पसरली आहे. यंदा धाराशिव जिल्ह्यामध्ये उशिरा पाऊस झाल्याने शेतकऱ्यांनी खरिपातील पिकांची उशिरा पेरणी केली , प्रामुख्याने जिल्ह्यामध्ये अलीकडे सोयाबीन पिकाकडे नगदी पीक म्हणून पाहिले जाते, त्यामुळे सोयाबीन पिकाची मोठ्या प्रमाणावर लागवड करण्यात आली आहे, त्यातच सोयाबीनवर सुरुवातीच्या काळात शंखी गोगलगायीचा प्रादुर्भाव, ऑगस्ट सप्टेंबर या महिन्यामध्ये अतिवृष्टी सततचा पाऊस , यलो मॅझक या कीड रोगाच्या प्रादुर्भावामुळे पिकांचे मोठ्या प्रमाणावर नुकसान झाले, त्यामुळे निसर्गाच्या संकटातून कसेबसे पीक वाचवुन चांगला भाव मिळेल या आशेने शेतकरी बसला होता, मात्र  मागील महिन्यापासून दरात होत असलेली घसरण यामुळे शेतकरी मोठ्या आर्थिक कोंडीत सापडला आहे.गेल्यावर्षी सोयाबीनचे दर मोठ्या प्रमाणावर वाढले होते,  परंतुत्यावेळी शेतकऱ्याकडे सोयाबीन शिल्लक नव्हते केवळ व्यापारांकडेच माल शिल्लक होते , मागील तीन वर्षापासून शेतकऱ्यांना कधी अतिवृष्टी कधी पावसाचा खंड, विविध कीड रोगाच्या प्रादुर्भावामुळे कंबरडे मोडले आहे शेतीतून मिळणाऱ्या उत्पादनापेक्षा खर्चा अधिक होत असल्याने दरवर्षी शेतकऱ्याच्या आर्थिक अडचणीत भर पडत आहे. निसर्गाच्या लहरीपणाचा उत्पादनावर मोठ्या प्रमाणावर फटका बसत आहे, महागाईच्या तुलनेत सरासरी आठ ते नऊ हजार पर्यंत भाव   ठेवणे गरजेचे आहे असे शेतकरी वर्गातून बोलले जात आहे. दिवाळी सण अवघ्या काही दिवसांवर येऊन ठेपला आहे त्यातच सोयाबीनचे दर घसरल्याने दिवाळी सण कसा साजरा करावा असा प्रश्न शेतकऱ्यासमोर पडला आहे. सद्यस्थितीमध्ये सोयाबीन पिकाची काढणी सुरू झालेली आहे यंदा सरासरी उत्पन्नाच्या 50% उत्पादनामध्ये घट येत आहे त्यातच सोयाबीन  अचानक भाव  गडगडल्याने शेतकरी वर्गात संताप व्यक्त केला जात आहे. 

यंदा सततचा पाऊस ,अतिवृष्टी, कीड रोगाचा प्रादुर्भाव यामुळे सोयाबीन पिकाची मोठी नुकसान झाले असून त्यातच सोयाबीनचे भाव गडगडल्याने केलेला खर्चही निघणे मुश्किल झाले आहे.                                                                                 प्रशांत बोडके, शेतकरी