महाळंगी येथील महालक्ष्मी यात्रा महोत्सवात भाविकांची मोठी गर्दी,हजारो भाविकांनी घेतला महाप्रसादाचा लाभ

महाळंगी येथील महालक्ष्मी यात्रा महोत्सवात भाविकांची मोठी गर्दी,हजारो भाविकांनी घेतला महाप्रसादाचा लाभ

प्रतिनिधी रुपेश डोलारे उस्मानाबाद

धाराशिव: धाराशिव तालुक्यातील महाळंगी येथील जागृत देवस्थान श्री महालक्ष्मी देवीच्या यात्रा महोत्सवात बुधवारी (दि.5) भाविकांची मोठी गर्दी झाली होती. यात्रेनिमित्ताने शिवसेनेचे उपशहरप्रमुख तथा सामाजिक कार्यकर्ते प्रशांत साळुंके यांच्या वतीने महाप्रसादाचे आयोजन केले. दिवसभरात हजारो भाविकांनी महाप्रसादाचा लाभ घेतला.

महाळंगी येथील श्री महालक्ष्मी देवीची दरवर्षी मोठी यात्रा भरते. प्रशांत साळुंके यांच्या शेतात मशागतीसाठी खोदकाम करताना ही मूर्ती आढळून आली होती. तिची विधीवत प्रतिष्ठापना करुन भव्य मंदिर उभारण्यात आलेले आहे. संततीप्राप्तीसाठी देखील इथे हजारो भाविक नवस बोलतात. संततीप्राप्ती झालेले दांपत्य येथे नवसपूर्तीसाठी यात्राकाळात मोठ्या संख्येने येतात, अशी माहिती प्रशांत साळुंके यांनी यावेळी दिली.

यावर्षीही यात्रेनिमित्त भव्यदिव्य कार्यक्रमाचे आयोजन केले होते. सकाळी देवींची मूर्ती व पालखीचे पूजन बाजार समितीचे माजी सभापती व्यंकटराव पाटील यांच्या हस्ते करण्यात आले. त्यानंतर मानकरी भारत ढवळे यांच्या निवासस्थानापासून पालखीचे मंदिराकडे प्रस्थान झाले. पालखी मंदिरात दाखल झाल्यानंतर भाविकांचे नवसपूर्ती व इतर धार्मिक कार्यक्रम पार पडले. यात्रेत महाळंगी गावासह चिखली, रूईभर, आंबेवाडी, बेंबळीसह परिसरातील इतर गावांमधून हजारो भाविकांनी श्री महालक्ष्मी देवीचे दर्शन घेतले. यात्रेसाठी आलेल्या भाविकांना शिवसेनेचे धाराशिव उपशहरप्रमुख प्रशांत साळुंके यांच्या वतीने महाप्रसादाची सोय करण्यात आली होती. दिवसभरात हजारो महिला, पुरूष भाविकांनी महाप्रसादाचा लाभ घेतला. यात्रा महोत्सवासाठी महाळंगी ग्रामस्थांनी परिश्रम घेतले.