छत्रपती संभाजीनगर: रील्स स्टारने निवृत्त प्राध्यापकाची केली गोळ्या झाडून हत्या ; दृश्यम’ स्टाईलनं पुरावा नष्ट करण्याचा प्रयत्न, तिघांना अटक-Chtrapatisambhaji Nagar Crime News

छत्रपती संभाजीनगर : रील्स स्टारकडून निवृत्त प्राध्यापकाची गोळ्या झाडून हत्या; ‘दृश्यम’ स्टाईलने पुरावा नष्ट करण्याचा प्रयत्न, तिघांना अटक

छत्रपती संभाजीनगर : उसने घेतलेल्या तब्बल ५० लाख रुपयांच्या पैशांसाठी तगादा लावणाऱ्या निवृत्त प्राध्यापकाची त्यांच्याच मित्राने गोळी झाडून हत्या केल्याची धक्कादायक घटना शहरात उघडकीस आली आहे. हत्या केल्यानंतर ‘Drishyam’ चित्रपटाच्या कथानकासारखा बनाव करून सीसीटीव्हीत कार दिसेल अशी योजना आखून पुरावे नष्ट करण्याचा प्रयत्न करण्यात आला. मात्र शहर पोलिसांच्या काटेकोर तपासामुळे हा गुन्हा उघड झाला असून रील्स स्टारसह तिघांना अटक करण्यात आली आहे. ही कारवाई दिनांक 15 मार्च रोजी करण्यात आली. ही माहिती पोलीस आयुक्त Praveen Pawar यांनी पत्रकार परिषदेत दिली.

अटक करण्यात आलेल्या आरोपींची नावे विशाल विकास राठोड (२४, रा. गेवराई तांडा), आकाश विनोद पवार आणि करण विलास आडे (रा. घारदोन) अशी आहेत. विशाल राठोड हा सोशल मीडियावर रील्स बनवणारा ‘रील्स स्टार’ म्हणून ओळखला जात होता.

पैशांच्या व्यवहारातून रचला खूनाचा कट

मृत प्राध्यापक राजाराम सुभराव लोंढे (६०, रा. ज्योतीनगर) हे दोन वर्षांपूर्वी शासकीय अभियांत्रिकी महाविद्यालयातून निवृत्त झाले होते. त्यांची आरोपी विशाल राठोडशी ओळख होती आणि दोघे अनेकदा एकत्र पार्टी करत असत. विशालने ‘लव्ह अँड डेअर’ नावाचा रिअॅलिटी शो तयार करून तो चॅनेलवर प्रसारित करण्याचा दावा करत प्रा. लोंढे यांच्याकडून ५० लाखांहून अधिक रक्कम घेतली होती.

मात्र हा शो प्रत्यक्षात न आल्याने प्रा. लोंढे यांनी वारंवार पैसे परत मागण्यास सुरुवात केली. पैशांचा तगादा वाढत असल्याने विशालने आपल्या साथीदारांसह त्यांची हत्या करण्याचा कट रचला. यासाठी घटनेच्या तीन दिवस आधी गेवराई तांडा परिसरातील शिवारात जेसीबीच्या साहाय्याने दोन खड्डे खोदून ठेवण्यात आले होते.

पार्टीच्या बहाण्याने फार्महाऊसवर नेऊन हत्या

५ मार्चच्या रात्री आरोपी विशाल आणि त्याच्या साथीदारांनी प्रा. लोंढे यांना पार्टीच्या बहाण्याने दौलताबाद येथील एका फार्महाऊसवर नेले. तेथून शहराकडे परतताना रस्त्यात लघुशंकेच्या बहाण्याने कार थांबवण्यात आली. प्रा. लोंढे कारमधून खाली उतरताच आरोपींनी त्यांच्या डोक्यात गोळी झाडून त्यांची हत्या केली.

यानंतर आरोपींनी त्यांचा मोबाईल काढून घेतला आणि मृतदेह कारमध्ये ठेवून शहरातील सिग्मा हॉस्पिटल, कांचनवाडी, ए.एस. क्लब आणि त्यांच्या घराजवळील परिसरात कार फिरवली. सीसीटीव्ही कॅमेऱ्यात कार दिसावी आणि आपण गुन्हा केलेला नाही असा आभास निर्माण व्हावा, हा त्यामागचा उद्देश होता.

सकाळी मृतदेह पुरून पुरावा नष्ट करण्याचा प्रयत्न

दुसऱ्या दिवशी सकाळी ६ ते ७ वाजण्याच्या दरम्यान आरोपींनी गेवराई तांडा परिसरातील आधीच खोदलेल्या खड्ड्यात मृतदेह पुरून पुरावा नष्ट करण्याचा प्रयत्न केला.

भावाच्या संशयामुळे उलगडला गुन्हा

प्रा. लोंढे घरी परतले नाहीत आणि त्यांचा मोबाईलही बंद लागत असल्याने त्यांचे भाऊ उत्तम सुभराव लोंढे यांनी उस्मानपुरा पोलीस ठाण्यात हरवल्याची तक्रार दाखल केली. तपासात विशेष प्रगती न झाल्याने त्यांनी दोन दिवसांपूर्वी पोलीस आयुक्तांची भेट घेऊन विशाल राठोड आणि त्याच्या साथीदारांवर संशय व्यक्त केला. त्यानंतर गुन्हेशाखेने सखोल तपास सुरू करून या खुनाचा उलगडा केला.

मोबाईलवरील ‘डोन्ट कॉल’ स्टेटसवरून पोलिसांना संशय

आरोपींनी ८ मार्च रोजी पुण्यात जाऊन प्रा. लोंढे यांचा मोबाईल सुरू केला आणि “I am in personal work, 20–25 days don’t call” असे स्टेटस ठेवले. मात्र आयआयटीमधून शिक्षण घेतलेल्या प्रा. लोंढे यांच्या इंग्रजी लिखाणाची शैली इतकी साधी नसल्याचा संशय पोलिसांना आला.त्यानंतर आरोपींना ताब्यात घेऊन चौकशी केली असता त्यांच्या जबाबात विसंगती आढळली. अखेर त्यांनी गुन्ह्याची कबुली देत मृतदेह पुरलेली जागा पोलिसांना दाखवून दिली.

तपास पथक

या गुन्ह्याचा तपास गुन्हेशाखेचे डीसीपी रत्नाकर नवले आणि एसीपी अशोक राजपूत यांच्या मार्गदर्शनाखाली पोलीस निरीक्षक गजानन कल्याणकर, उस्मानपुरा पोलीस ठाण्याचे निरीक्षक संग्राम ताठे, एपीआय शिवाजी चौरे, उपनिरीक्षक प्रवीण वाघ, अभिषेक चिखलीकर तसेच विजय निकम, विजय घुगे, राहुल बंगाळे, अभिषेक बांठे, सागर शेठे, पूजा भोसले, माया माळी, वनिता तुपे आणि तातेराव शिनगारे यांच्या पथकाने केला.या धक्कादायक घटनेमुळे शहरात मोठी खळबळ उडाली असून पैशांच्या व्यवहारातून घडलेल्या या हत्येची चर्चा सर्वत्र सुरू आहे.