मुरुममध्ये खंडणीस नकार दिल्याने ज्येष्ठ नागरिकावर हल्ला; दीड तोळ्याची साखळी लुटून आरोपींची धमकी-Murum Crime News Live

मुरुममध्ये खंडणीस नकार दिल्याने ज्येष्ठ नागरिकावर हल्ला; दीड तोळ्याची साखळी लुटून आरोपींची धमकी-Murum Crime News Live 

मुरुम (ता. उमरगा, जि. धाराशिव) – प्रतिनिधी :
मुरुम परिसरात खंडणी मागून जबरदस्तीने मुद्देमाल हिसकावून नेण्याची धक्कादायक घटना समोर आली आहे. खंडणी देण्यास नकार दिल्यामुळे दोन आरोपींनी एका 61 वर्षीय ज्येष्ठ नागरिकावर मारहाण करून त्यांच्या गळ्यातील दीड तोळ्याची सोन्याची साखळी लुटल्याचा प्रकार घडला आहे.

या प्रकरणी मुरुम पोलीस ठाण्यात महेश विरेश गव्हाणे व भुवनेश्वर विरेश गव्हाणे (दोघे रा. मुरुम, ता. उमरगा, जि. धाराशिव) यांच्याविरुद्ध गुन्हा नोंद करण्यात आला आहे.

पोलिसांनी दिलेल्या माहितीनुसार, दि. 29 मार्च 2026 रोजी सायंकाळी सुमारे 6.30 वाजण्याच्या सुमारास मुरुम येथील शेत गट क्रमांक 148/5 मध्ये ही घटना घडली. फिर्यादी संजय शामसुंदर मिणीयार (वय 61, रा. बसवेश्वर चौक, मुरुम) हे त्यांच्या शेतात असताना आरोपींनी बांधाच्या मध्यभागी लोखंडी खांब रोवल्याच्या कारणावरून त्यांच्याकडे 50 हजार रुपयांची खंडणी मागितली.

मात्र, मिणीयार यांनी खंडणी देण्यास नकार दिल्यानंतर आरोपी संतापले. त्यांनी शिवीगाळ करत लाथाबुक्यांनी मारहाण केली. याचवेळी आरोपींनी जबरदस्तीने त्यांच्या गळ्यातील सुमारे दीड तोळ्याची सोन्याची साखळी तोडून घेतली व घटनास्थळावरून पसार झाले.

इतक्यावरच न थांबता, “तक्रार केलीस तर तुझ्या मुलाला जीवे मारू,” अशी गंभीर धमकीही आरोपींनी दिली असल्याचे फिर्यादीत नमूद आहे.

या घटनेनंतर दि. 3 एप्रिल 2026 रोजी संजय मिणीयार यांनी मुरुम पोलीस ठाण्यात फिर्याद दिली. त्यानुसार पोलिसांनी भारतीय न्याय संहितेच्या कलम 119(1), 308(2), 115(2), 351(2), 352, 3(5) अन्वये गुन्हा नोंदवला आहे.

सदर प्रकरणाचा पुढील तपास मुरुम पोलीस करत असून आरोपींचा शोध सुरू आहे. या घटनेमुळे परिसरात भीतीचे वातावरण निर्माण झाले आहे.