टॉवरच्या कामगारांना मारहाण करून बांधले; 2.64 लाखांची ॲल्युमिनियम तार लुटली-Naldurg Police Station Crime News
चिवरी शिवारातील धाडसी चोरी; तिघा अनोळखी आरोपींविरुद्ध नळदुर्ग पोलिसांत गुन्हा
तुळजापूर, दि. 7 : धाराशिव जिल्ह्यातील तुळजापूर तालुक्यातील चिवरी शिवारात टॉवरवरील कामगारांना जिवे मारण्याची धमकी देत मारहाण करून टॉवरला बांधून ठेवत कंपनीची लाखो रुपयांची ॲल्युमिनियमची तार जबरीने चोरून नेल्याची धक्कादायक घटना घडली आहे. या प्रकरणी नळदुर्ग पोलीस ठाण्यात तिघा अनोळखी आरोपींविरुद्ध गुन्हा दाखल करण्यात आला आहे.
याबाबत नागेशा टी (वय 39, रा. टी.एन. कोटे, ता. चेल्लाकेरे, जि. चित्रदुर्ग, कर्नाटक, सध्या रा. अणदूर, ता. तुळजापूर, जि. धाराशिव) यांनी फिर्याद दिली आहे.
पोलिसांनी दिलेल्या माहितीनुसार, चिवरी शिवारातील गट क्रमांक 262, 279 व 280 मधील टॉवर क्रमांक 34/2 व एपी-35 येथे कंपनीचे कामगार मंजल किसकु आणि बबलू टुडू हे काम करत असताना तीन अनोळखी व्यक्ती तेथे आल्या. आरोपींनी दोन्ही कामगारांना जिवे ठार मारण्याची धमकी देत लाथाबुक्यांनी मारहाण केली. त्यानंतर त्यांना टॉवरला बांधून ठेवून कंपनीच्या मालकीची 380 मीटर लांबीची 32 मिमी ॲल्युमिनियमची तार, अंदाजे 2 लाख 64 हजार रुपये किमतीची, जबरीने चोरून नेली.
घटनेनंतर फिर्यादी नागेशा टी यांनी 6 जुलै 2026 रोजी नळदुर्ग पोलीस ठाण्यात तक्रार दाखल केली. त्यांच्या फिर्यादीवरून पोलिसांनी भारतीय न्याय संहिता (BNS) कलम 309(6) व 3(5) अन्वये गुन्हा नोंदवला आहे.
या धाडसी चोरीमुळे परिसरात खळबळ उडाली असून, आरोपींचा शोध घेण्यासाठी नळदुर्ग पोलिसांनी तपासाची चक्रे वेगाने फिरविली आहेत. घटनास्थळावरील पुरावे, तसेच परिसरातील सीसीटीव्ही फुटेज आणि इतर तांत्रिक बाबींच्या आधारे आरोपींचा शोध सुरू असल्याची माहिती पोलिसांकडून देण्यात आली आहे.
0 Comments