बांधकाम कामगार योजनांमध्ये दलालांचा सुळसुळाट; ‘अर्धे तुम्ही-अर्धे आम्ही’चा खेळ उघड-Bandhkam kamgar Scheme Fraud Dharashiv News
गरजू कामगारांची उघड लूट; दोषींवर तात्काळ कारवाई करा – राष्ट्रवादी विद्यार्थी काँग्रेसचे जिल्हाधिकाऱ्यांना निवेदन-
धाराशिव /प्रतिनिधी बिभीषण मिटकरी : राज्य शासनाच्या विविध बांधकाम कामगार कल्याण योजनांचा लाभ मिळवून देण्याच्या नावाखाली जिल्ह्यात काही दलाल आणि मध्यस्थांनी अक्षरशः लुटमारीचा व्यवसाय सुरू केल्याचा गंभीर आरोप समोर आला आहे. योजनेतून मिळणाऱ्या आर्थिक मदतीपैकी तब्बल ५० टक्के रक्कम कमिशन म्हणून घेतली जात असल्याचे प्रकार उघडकीस येत असल्याने या प्रकरणाची सखोल चौकशी करून दोषींवर कठोर कारवाई करावी, अशी मागणी राष्ट्रवादी विद्यार्थी काँग्रेसच्या वतीने करण्यात आली आहे.
यासंदर्भात राष्ट्रवादी विद्यार्थी काँग्रेसच्या पदाधिकाऱ्यांनी शुक्रवारी (दि. १३) जिल्हाधिकारी कार्यालयात निवेदन देत प्रशासनाचे लक्ष वेधले. शासनाने बांधकाम क्षेत्रातील गरजू आणि असंघटित कामगारांना आर्थिक मदत, शैक्षणिक सहाय्य, वैद्यकीय मदत, साधनसामग्री आदी विविध योजना उपलब्ध करून दिल्या आहेत. मात्र या योजनांचा लाभ मिळवून देण्याच्या नावाखाली काही एजंट आणि दलाल सक्रिय झाले असून ते कामगारांकडून मोठ्या प्रमाणात पैसे उकळत असल्याचे निवेदनात नमूद करण्यात आले आहे.
निवेदनानुसार, हे एजंट कामगारांचे अर्ज भरून देणे, कागदपत्रांची पूर्तता करणे किंवा योजना मंजूर करून देण्याचे आमिष दाखवून लाभार्थ्यांकडून योजनेत मिळणाऱ्या रकमेपैकी सुमारे अर्धी रक्कम कमिशन म्हणून घेत आहेत. ‘अर्धे तुम्ही – अर्धे आम्ही’ अशा प्रकारची उघड पद्धत राबवली जात असल्याने गरीब आणि गरजू कामगारांची आर्थिक फसवणूक होत आहे. त्यामुळे शासनाच्या कल्याणकारी योजनांचा मूळ उद्देशच धोक्यात येत असल्याचेही निवेदनात नमूद करण्यात आले आहे.
या प्रकाराला तात्काळ आळा घालण्यासाठी संबंधित दलाल आणि मध्यस्थांची सखोल चौकशी करून त्यांच्यावर कठोर कारवाई करण्यात यावी, तसेच कामगारांना कोणत्याही दलालांशिवाय योजनांचा लाभ थेट मिळेल अशी पारदर्शक व्यवस्था प्रशासनाने निर्माण करावी, अशी मागणी राष्ट्रवादी विद्यार्थी काँग्रेसच्या वतीने करण्यात आली आहे.
यावेळी राष्ट्रवादी विद्यार्थी काँग्रेसचे जिल्हाध्यक्ष ज्ञानेश्वर निंबाळकर, पृथ्वीराज मुळे, सहीद पटेल, अल्लानूर पठाण यांच्यासह पदाधिकारी व विद्यार्थी उपस्थित होते.
0 Comments