तुळजापूर येथील भगवान पारधे यांच्यावर झालेल्या जीवघेणा हल्ला प्रकरणात 307 कलम लावण्याची पारधे कुटुंबियाची वरिष्ठांकडे मागणी
तुळजापूर (प्रतिनिधी) : तुळजापूर शहरातील भगवान अनिल पारधे यांच्यावर झालेल्या कथित जीवघेण्या हल्ल्याच्या प्रकरणाने गंभीर वळण घेतले असून, संबंधित गुन्ह्यात भारतीय दंड संहिता कलम 307 (खून करण्याचा प्रयत्न) लागू करण्याची मागणी पीडिताकडून करण्यात आली आहे. यासाठी वरिष्ठ पोलीस अधिकाऱ्यांकडे धाव घेत निवेदन देण्यात आले असून, मागणी मान्य न झाल्यास आत्मदहन करण्याचा इशाराही देण्यात आला आहे.
पीडित भगवान पारधे यांनी दिलेल्या माहितीनुसार, दि. 5 एप्रिल 2026 रोजी रात्री साडेनऊ ते दहा वाजण्याच्या सुमारास त्यांच्यावर हल्ला करण्यात आला. या हल्ल्यात सुरज रसाळ, चिंता रसाळ आणि आशिष पवार यांनी लोखंडी पाईप, फायटर व दगडाच्या साहाय्याने डोक्यावर वार करत त्यांना ठार मारण्याचा प्रयत्न केल्याचा आरोप करण्यात आला आहे.
या घटनेदरम्यान त्यांचा भाऊ शंकर पारधे घटनास्थळी पोहोचल्यामुळे त्यांचा जीव वाचल्याचेही त्यांनी सांगितले. तसेच या प्रकरणात अक्षय परमेश्वर यांनीही धमक्या दिल्याचा आरोप पीडिताने केला आहे.
हल्ल्यानंतर जखमी अवस्थेत पारधे यांना तुळजापूर येथील शासकीय रुग्णालयात दाखल करण्यात आले. डोक्याला टाके घालण्यात आले असून प्रकृती गंभीर असल्याने त्यांना पुढील उपचारासाठी धाराशिव येथील रुग्णालयात हलवण्यात आले. काही काळ आयसीयूमध्ये उपचार घेतल्यानंतर त्यांची प्रकृती स्थिर झाल्याचे सांगण्यात येते.
दरम्यान, पीडिताने असा आरोप केला आहे की, जबाब नोंदवताना काही पोलीस अधिकाऱ्यांनी अक्षय परमेश्वर यांचे नाव घेऊ नये, असा दबाव टाकला. मात्र, त्यांनी यास नकार देत न्यायासाठी वरिष्ठ अधिकाऱ्यांकडे जाण्याचा निर्णय घेतला.
या पार्श्वभूमीवर संबंधित गुन्हा क्रमांक 72/2026 मध्ये कलम 307 समाविष्ट करावे, अशी ठाम मागणी करण्यात आली आहे. तसेच, दि. 13 एप्रिल 2026 रोजी पोलीस अधीक्षक कार्यालय, धाराशिव येथे कुटुंबासह आत्मदहन करण्याची परवानगी द्यावी, अशी मागणीही निवेदनाद्वारे करण्यात आली आहे.
पीडिताने पुढे नमूद केले की, या प्रकरणातील सत्य परिस्थिती समोर आणण्यासाठी घटनास्थळावरील सीसीटीव्ही फुटेज तपासावे, तसेच त्यांच्या कुटुंबाला धमक्या दिल्या जात असल्याने संरक्षण देण्यात यावे.या प्रकरणामुळे तुळजापूर शहरात एकच खळबळ उडाली असून, पोलिस प्रशासनाची भूमिका आणि पुढील कारवाईकडे सर्वांचे लक्ष लागले आहे.
0 Comments