मंगरूळमध्ये युवकाची निर्घृण हत्या; डोक्यात वार करून मृतदेह पुलाजवळ फेकला, फरपटत नेल्याचा संशय-
तुळजापूर : तालुक्यातील मंगरूळ परिसरात ३६ वर्षीय युवकाची निर्घृण हत्या झाल्याची धक्कादायक घटना शुक्रवारी (दि. १६) सकाळी उघडकीस आली. या घटनेमुळे संपूर्ण परिसरात भीतीचे वातावरण निर्माण झाले असून नागरिकांमध्ये मोठी खळबळ उडाली आहे.
मृत युवकाचे नाव कृष्णा आनंद साठे (वय ३६, रा. मंगरूळ) असे असून त्यांचा मृतदेह तुळजापूर-अक्कलकोट मार्गावर मंगरूळपासून सुमारे १ ते २ किलोमीटर अंतरावरील पुलाजवळ आढळून आला. सकाळी सुमारे ७ वाजण्याच्या सुमारास ही घटना उघडकीस आली.
प्राथमिक माहितीनुसार, अज्ञात व्यक्तीने साठे यांच्या डोक्यात जड वस्तूने वार करून त्यांची हत्या केली असावी, असा अंदाज पोलिसांनी व्यक्त केला आहे. घटनास्थळाची पाहणी करताना मृतदेह सुमारे १०० ते २०० मीटर अंतरावर फरपटत नेण्यात आल्याचे दिसून आले असून, हा खून पूर्वनियोजित असल्याचा संशय अधिक बळावला आहे.
घटनेची माहिती मिळताच उपविभागीय पोलीस अधिकारी डॉ. निलेश देशमुख, पोलीस निरीक्षक अण्णासाहेब मांजरे, सहाय्यक पोलीस निरीक्षक नामदेव मुद्दे, पोलीस उपनिरीक्षक विजय थोटे यांच्यासह पोलीस पथक तातडीने घटनास्थळी दाखल झाले. त्यांनी पंचनामा करून तपासाची सूत्रे हाती घेतली आहेत.
तपासासाठी फॉरेन्सिक आणि श्वान पथकाला पाचारण करण्यात आले असून घटनास्थळावरून महत्त्वाचे पुरावे गोळा करण्याचे काम सुरू आहे. दरम्यान, या प्रकरणात एका संशयिताला पोलिसांनी ताब्यात घेतल्याची माहिती समोर आली असून त्याची कसून चौकशी सुरू आहे.
हत्येमागील नेमके कारण काय, या घटनेत आणखी कोणाचा सहभाग आहे का, तसेच मृतदेह दुसरीकडे हलवण्यामागचा उद्देश काय होता, याचा सर्व बाजूंनी तपास सुरू आहे. आरोपींना लवकरात लवकर अटक करण्यासाठी पोलीस यंत्रणा प्रयत्न करत आहे.
▪️ ठळक मुद्दे :
- ३६ वर्षीय युवकाची डोक्यात जड वस्तूने वार करून हत्या
- मृतदेह पुलाजवळ आढळला; १००-२०० मीटर फरपटत नेल्याचा संशय
- खून पूर्वनियोजित असल्याचा पोलिसांचा अंदाज
- एक संशयित ताब्यात; चौकशी सुरू
- तुळजापूर तालुक्यात भीतीचे वातावरण 🔴
0 Comments