मंगरूळ येथील अनैतिक संबंधातून पतीची निर्घृण हत्या आरोपी पत्नी व प्रियकराला वाढीव पोलिस कोठडी-Police Custody
धाराशिव | बालाघाट न्युज टाइम्स
तुळजापूर तालुक्यातील मंगरूळ येथे अनैतिक प्रेमसंबंधातून पतीची थंड डोक्याने हत्या केल्याच्या प्रकरणात न्यायालयाने आरोपी पत्नी व तिच्या प्रियकराला वाढीव पोलिस कोठडी सुनावली आहे. तर गुन्ह्यात मदत करणाऱ्या एका आरोपीला न्यायालयीन कोठडीनंतर धाराशिव येथील कारागृहात पाठविण्यात आले आहे. या प्रकरणामुळे संपूर्ण परिसरात खळबळ उडाली आहे. दिनांक 21 एप्रिल रोजी त्यांना न्यायालयासमोर हजर केले असता न्यायालयाने वाढीव पोलीस कोठडी मंजूर केली आहे.
पोलिस तपासात आरोपी महिलेचे अनेक पुरुषांशी संबंध असल्याची धक्कादायक माहिती समोर आली आहे. या हत्येमागे आणखी कोणी सहभागी आहे का, तसेच किती दिवसांपासून हा कट रचला जात होता, याचा तपास सध्या सुरू आहे. विशेष म्हणजे आरोपी प्रियकराने महिलेच्या एका जुन्या प्रियकराचाही खून करण्याचा प्रयत्न केला होता, मात्र तो सुदैवाने बचावला.
प्रेमसंबंधातून रचला कट
मृत कृष्णा आनंद साठे (वय 36) हे 14 एप्रिल रोजी सायंकाळी “गावात जाऊन येतो” असे सांगून घराबाहेर पडले, मात्र ते परतलेच नाहीत. आरोपी शुभम मल्लिकार्जुन घाटोळे याने त्यांना गोड बोलून दुचाकीवरून शेतात नेले. तेथे त्याने “तुझी पत्नी मला आवडते, तू आमच्यात अडथळा आहेस” असे सांगत बाजूला होण्यास सांगितले. कृष्णा यांनी नकार दिल्यानंतर आरोपीने लाकडी ओंडक्याने त्यांच्या डोक्यावर प्रहार केला.
जखमी अवस्थेत असताना कृष्णा यांनी जीव वाचवण्यासाठी विनंती केली, मात्र आरोपीने कोणतीही दया न दाखवता त्यांना ठार केले.
गुन्हा लपवण्याचा प्रयत्न
हत्या केल्यानंतर आरोपींनी मृतदेह शेतातील बैलांच्या कोठ्यात लपवला. त्यानंतर तो पोत्यात भरून दुसऱ्या आरोपीच्या मदतीने एका पुलाजवळ नेऊन 30-40 मीटरपर्यंत फरपटत टाकण्यात आला. त्यानंतर आरोपीने पत्नीला “काम ओके झाले” असा संदेश दिला.
पोलिसांची शिताफीने उकल
घटनास्थळाचा तपास, फॉरेन्सिक पुरावे, श्वान पथक, सीसीटीव्ही फुटेज आणि गोपनीय माहितीच्या आधारे पोलिसांनी या गुन्ह्याचा पर्दाफाश केला. या प्रकरणात आतापर्यंत तीन आरोपींना अटक करण्यात आली असून इतर संशयितांचा शोध सुरू आहे.
धक्कादायक पार्श्वभूमी
मयताची पत्नी प्रतिभा साठे व आरोपी शुभम यांचे गेल्या 5-6 महिन्यांपासून प्रेमसंबंध होते. विशेष म्हणजे शुभम हा प्रतिभापेक्षा वयाने 5 वर्षांनी लहान होता. दोन मुलांचा संसार असूनही या संबंधातून हत्या घडल्याचे उघड झाले आहे. महिलेचे यापूर्वीही अनेक संबंध असल्याचे तपासात समोर आले आहे.
पोलिसांचे मार्गदर्शन
ही कारवाई पोलीस अधीक्षक रितू खोकर, अपर पोलीस अधीक्षक शफकत आमना, उपविभागीय पोलीस अधिकारी डॉ. निलेश देशमुख यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक विनोद इज्जपवार, पोलीस निरीक्षक अण्णासाहेब मांजरे, सहाय्यक पोलीस निरीक्षक अमोल मोरे व त्यांच्या पथकाने या तपासात महत्त्वाची भूमिका बजावली.
प्रेमसंबंध, विश्वासघात आणि गुन्हेगारी मानसिकतेचा हा थरारक संगम असून, पोलिसांनी दाखवलेल्या तत्परतेमुळे गुन्ह्याची उकल झाली आहे. मात्र या प्रकरणात अजूनही काही धागेदोरे शोधायचे बाकी असल्याने तपास सुरूच आहे.
0 Comments