दिंडेगाव तळ्यावरून मोटारीची ३ हजार फूट वायर चोरी; ६० हजारांचा ऐवज लंपास, नळदुर्ग पोलिसांत गुन्हा दाखल-Live Breaking News- Daily
धाराशिव, दि. २५ : तुळजापूर तालुक्यातील दिंडेगाव परिसरात शेतातील पाणीपुरवठ्यासाठी वापरल्या जाणाऱ्या मोटारीची वायर चोरीला गेल्याची घटना उघडकीस आली असून या प्रकरणी नळदुर्ग पोलीस ठाण्यात अज्ञात व्यक्तीविरोधात गुन्हा नोंद करण्यात आला आहे.
पोलिसांनी दिलेल्या माहितीनुसार, फिर्यादी सुरज बसवेश्वर बचाटे (वय २८, रा. हिप्परगा ताड, ता. तुळजापूर, जि. धाराशिव) यांच्या दिंडेगाव येथील तळ्यावरील मोटारीला जोडलेली सुमारे ३ हजार फूट लांबीची वायर अज्ञात चोरट्याने चोरून नेली. चोरी गेलेल्या वायरची अंदाजे किंमत ६० हजार रुपये असल्याचे सांगण्यात आले आहे.
ही घटना दि. ३ जून २०२६ रोजी सायंकाळी ५ वाजल्यापासून ते दि. ४ जून २०२६ रोजी सकाळी ६ वाजेदरम्यान घडल्याचे फिर्यादीत नमूद करण्यात आले आहे. शेत परिसरातील पाणीपुरवठा व्यवस्थेसाठी ही वायर महत्त्वाची असल्याने शेतकऱ्याला आर्थिक फटका बसला आहे.
याप्रकरणी सुरज बचाटे यांनी दि. २४ जून २०२६ रोजी दिलेल्या प्रथम खबरीवरून नळदुर्ग पोलीस ठाण्यात भारतीय न्याय संहिता (भा.न्या.सं.) कलम ३०३(२) अन्वये अज्ञात आरोपीविरुद्ध गुन्हा दाखल करण्यात आला आहे.
पोलिसांकडून घटनास्थळाची पाहणी करण्यात आली असून परिसरातील माहिती व उपलब्ध धागेदोरे तपासून चोरट्यांचा शोध सुरू असल्याची माहिती देण्यात आली आहे.
.jpg)
0 Comments