मोठी कारवाई! नळदुर्ग - तुळजापूर रोडवर तब्बल ₹10.38 कोटींचे हशीम ऑईल जप्त- नळदुर्ग पोलिसांची कारवाई 🚨
धाराशिव : तुळजापूर तालुक्यातील नळदुर्ग पोलीस ठाण्याच्या पथकाने अंमली पदार्थांविरोधात मोठी कारवाई करत तब्बल ₹10,38,20,000 किंमतीचे हशीम ऑईल जप्त केले आहे. या कारवाईमुळे परिसरात एकच खळबळ उडाली आहे.
या घटनेबाबत पोलिसांकडून मिळालेली अधिक माहिती अशी की ,दि. 19 मार्च 2026 रोजी नळदुर्ग पोलीस ठाण्याचे पोलीस निरीक्षक श्री. सोळुंके व पोलीस उपनिरीक्षक श्री. गिते हे आपल्या पथकासह उपजिल्हा रुग्णालय नळदुर्ग ते तुळजापूर मार्गावर नाकाबंदी व कोम्बिंग ऑपरेशन करत होते. त्यावेळी एक संशयास्पद MH 12 GV 1517 क्रमांकाची कार दिसून आली. पोलिसांनी गाडी थांबवण्याचा इशारा दिला असता चालकाने गाडी न थांबवता पळ काढला.
यावेळी पोलिसांनी तत्काळ पाठलाग सुरू केला. दरम्यान, गाडीतून एका इसमाने रस्त्याच्या कडेला एक बॅग फेकून दिली. पोलिसांनी ती बॅग ताब्यात घेऊन तपासणी केली असता, त्यामध्ये १० प्लास्टिक पिशव्यांमध्ये भरलेले हिरवट-काळपट रंगाचे हशीम ऑईल सदृश्य अंमली पदार्थ आढळून आले.
तपासणीत या अंमली पदार्थाचे वजन 10.382 किलो असून त्याची अंदाजे किंमत ₹10.38 कोटी असल्याचे समोर आले. पोलिसांनी तत्काळ पंचनामा करून हा सर्व मुद्देमाल जप्त केला.
या प्रकरणी अंमली पदार्थ बाळगणाऱ्या दोन अज्ञात इसमांविरोधात गुंगीकारक औषधीद्रव्य आणि मनोव्यापारावर परिणाम करणारे पदार्थ अधिनियम (NDPS Act) अंतर्गत कलम 8(सी), 20(B)(ii)(C), 25, 29 नुसार गुन्हा क्रमांक 114/2026 दाखल करण्यात आला आहे.
ही कारवाई पोलीस अधीक्षक श्रीमती रितु खोखर व अप्पर पोलीस अधीक्षक श्रीमती शफकत आमना यांच्या मार्गदर्शनाखाली पार पडली. तसेच उपविभागीय पोलीस अधिकारी श्री. निलेश देशमुख, नळदुर्ग पोलीस ठाण्याचे प्रभारी अधिकारी मेघना आय. एन., पोलीस निरीक्षक श्री. सोळुंके, आनंद कांगुने, उपनिरीक्षक श्री. गिते व संपूर्ण पोलीस पथकाने ही धडक कारवाई केली.
या घटनेचा पुढील तपास सुरू असून आरोपींचा शोध घेण्यासाठी पोलिसांची विशेष पथके कार्यरत आहेत.
0 Comments