बीड :भरधाव टिप्परचा कहर! कारला धडक देताच पेट घेतला; माय-लेकाचा जागीच होरपळून मृत्यू-Beed Accident News Live 
बीड प्रतिनिधी : बीड जिल्ह्यातील आष्टी तालुक्यात कापसी फाट्यावर घडलेल्या भीषण अपघाताने संपूर्ण जिल्हा हादरला आहे. भरधाव आणि अनियंत्रित टिप्परने कारला दिलेल्या जोरदार धडकेनंतर कारने पेट घेतल्याने गाडीत अडकलेल्या माय-लेकाचा जागीच होरपळून मृत्यू झाला. ही हृदयद्रावक घटना दि. २७ रोजी सकाळी सुमारे ११ वाजण्याच्या सुमारास घडली.
या अपघातात ह.भ.प. श्रीहरी महाराज पुरी यांच्या पत्नी पुष्पा श्रीहरी पुरी (वय ४२) आणि त्यांचा मुलगा ऋषिकेश श्रीहरी पुरी (वय २५) यांचा दुर्दैवी मृत्यू झाला आहे. या घटनेने आष्टी तालुका आणि संपूर्ण बीड जिल्ह्यावर शोककळा पसरली आहे.
धडकेत कारचा चक्काचूर, क्षणात पेटली आग
मिळालेल्या माहितीनुसार, पुष्पा पुरी आणि त्यांचा मुलगा ऋषिकेश हे आष्टीहून बीडकडे कारने प्रवास करत होते. कापसी फाट्याजवळ समोरून येणाऱ्या (क्रमांक MH 16 CD 7305) भरधाव टिप्परने त्यांच्या कारला समोरून जबरदस्त धडक दिली.
धडक इतकी भीषण होती की कारचा अक्षरशः चक्काचूर झाला आणि काही क्षणातच कारने पेट घेतला. आगीने काही सेकंदात रौद्ररूप धारण केल्याने गाडीत बसलेल्या माय-लेकाला बाहेर पडण्याची संधीच मिळाली नाही. दोघेही गाडीतच अडकून आगीच्या भक्ष्यस्थानी पडले.
बचावकार्यात अडचणी; दीड-दोन तासांनी मृतदेह बाहेर
घटनेची माहिती मिळताच स्थानिक ग्रामस्थ, पोलीस आणि अग्निशामक दलाने घटनास्थळी धाव घेतली. मात्र कार पूर्णतः जळालेली आणि चेंदामेंदा झाल्याने मृतदेह बाहेर काढणे अत्यंत कठीण झाले.
मृतदेह गाडीच्या पत्र्यांमध्ये आणि सीटमध्ये अडकले होते. अखेर कटरच्या सहाय्याने गाडीचे पत्रे कापून तब्बल दीड ते दोन तासांच्या प्रयत्नांनंतर मृतदेह बाहेर काढण्यात आले.
वडील कीर्तनात असतानाच कोसळला दुःखाचा डोंगर
या घटनेतील सर्वात वेदनादायी बाब म्हणजे, मयत ऋषिकेशचे वडील श्रीहरी पुरी हे आष्टी पंचायत समितीत ग्रामसेवक असून ते एक प्रसिद्ध कीर्तनकार आहेत. अपघाताच्या वेळी ते एका ठिकाणी हरिनामाच्या कीर्तनात मग्न होते.
कीर्तन सुरू असतानाच त्यांच्या पत्नी आणि मुलाच्या मृत्यूची बातमी मिळताच उपस्थित भाविक आणि नागरिक स्तब्ध झाले. एका क्षणात संपूर्ण संसार उद्ध्वस्त झाल्याने सर्वत्र हळहळ व्यक्त केली जात आहे.
नागरिकांत संताप; कडक कारवाईची मागणी
या भीषण अपघातानंतर परिसरातील नागरिकांमध्ये तीव्र संताप व्यक्त होत आहे. भरधाव वेगाने धावणाऱ्या जड वाहनांमुळे अशा घटना वारंवार घडत असून, वाहतूक नियमांचे उल्लंघन करणाऱ्या चालकांवर कठोर कारवाई करावी, अशी मागणी जोर धरू लागली आहे.
कापसी फाट्यावरील हा अपघात केवळ एक दुर्घटना नसून, वाहतुकीतील बेफिकीरीचा आणखी एक बळी ठरला आहे. प्रशासनाने यापुढे अशा घटनांना आळा घालण्यासाठी कठोर उपाययोजना करणे अत्यंत गरजेचे असल्याचे नागरिकांकडून व्यक्त केले जात आहे.
0 Comments