धक्कादायक! फोटो व्हायरल करण्याचे धमकी देत तरुणाकडून महिलेवर लैंगिक अत्याचार - तरुणावर गुन्हा दाखल लोहारा तालुक्यातील घटना-Lohara Crime News Live
धाराशिव (प्रतिनिधी) – लोहारा तालुक्यातील एका गावात 24 वर्षीय विवाहित महिलेवर एका तरुणाने दीर्घकाळ लैंगिक अत्याचार केल्याची गंभीर घटना समोर आली आहे. या प्रकरणामुळे परिसरात खळबळ उडाली असून संबंधित आरोपींविरुद्ध लोहारा पोलीस ठाण्यात गुन्हा दाखल करण्यात आला आहे.
या घटनेबाबत पोलिसांनी दिलेल्या माहितीनुसार, एप्रिल 2023 पासून ते 19 मार्च 2026 पर्यंत आरोपीने पीडित महिलेला बेशुद्ध करून जबरदस्तीने शारीरिक संबंध ठेवले. याच वेळी तिचे छायाचित्र काढून ते व्हायरल करण्याची धमकी दिली. तसेच “तुझ्या खात्यावर 10 लाख रुपये टाकतो” असे आमिष दाखवत आरोपीने वेळोवेळी वेगवेगळ्या लॉजवर नेऊन तिच्यावर अत्याचार केल्याचे तक्रारीत नमूद आहे.
दरम्यान, पीडित महिला आरोपीच्या दबावाखाली राहिली. मात्र, तिने विरोध केल्याचे लक्षात येताच आरोपीने तिची छायाचित्रे तिच्या पतीच्या मोबाईलवर पाठवून तिची बदनामी केली.
या प्रकारामुळे मानसिक त्रास सहन करत अखेर पीडितेने 23 मार्च 2026 रोजी लोहारा पोलीस ठाण्यात फिर्याद दिली. त्या आधारे पोलिसांनी भारतीय न्याय संहिता कलम 64, 64(1), 352, 356(2) तसेच माहिती तंत्रज्ञान अधिनियम कलम 67 अन्वये गुन्हा नोंदवला आहे.
या प्रकरणाचा अधिक तपास लोहारा पोलीस करत असून आरोपीचा शोध सुरू असल्याची माहिती पोलिसांनी दिली आहे. या घटनेमुळे महिलांच्या सुरक्षिततेचा प्रश्न पुन्हा एकदा ऐरणीवर आला आहे.
0 Comments